E hemo hou ana ka Pāka Luapele.
ʻO ia aʻela kekahi poʻo nūhou o kēia lā, ka lā 19 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
ʻAuhea ʻoukou e ka poʻe koʻele wāwae. E akahele ma ko ʻoukou wā e naue ana, he mau ulia kai ʻike ʻia, kahi i make ai kekahi koʻele wāwae a i ʻeha kūpilikiʻi ai kekahi. Ma kahi e kokoke ana i ka Walmart o Kapolei i ka pō nei, make ihola kekahi wahine i manaʻo ʻia, ua hoʻokuʻi ʻia ʻo ia e kekahi kaʻa. A i ka hiki ʻana aku o nā kahu lapaʻau ulia, ua pau ihola ia wahine i ka make. Aia nō ka mākaʻi ke noiʻi akula. A ma ka huina o ke alanui ʻo Young a me ke alanui ʻo Victoria ma kahi o ka hola 7:45 o ka pō nei, aia kekahi ulia, kahi i ʻeha kūpilikiʻi ai kekahi ʻelemakule. Lapaʻau ʻia ihola ua ʻelemakule nei e nā kahu lapaʻau ulia, a lawe ʻia akula i ka haukapila ma ke kūlana kūpilikiʻi. ʻAʻole i akāka kona mea i ʻeha ai, he kaʻa paha, ʻaʻole paha.
E hemo hou ana ka Pāka Aupuni Luapele o Hawaiʻi i ka hola 10:00 o kēia Pōʻaono, a he manuahi ke komo ʻana ma ia lā. A ua kuhi ʻia, e nui hewahewa ana nā kānaka e mākaʻikaʻi ana i kēia Pōʻaono, a ʻo kekahi pilikia, ua emi ihola nā wahi kūkulu kaʻa, he hapakolu, a ʻaʻohe wai mānalo o ka pāka, ʻo ia hoʻi, ʻaʻohe wai kūpono i ka inu. Ma mua o ke pani ʻia ʻana o ka Pāka, ʻo ka mea maʻa mau, he 5,500 mau kānaka mākaʻikaʻi o ka lā. A i ka hola 10:00 o ke kakahiaka, piha ʻē nā wahi kūkulu kaʻa. A ʻo ka poʻe e hele ana i laila e mākaʻikaʻi ai i kēia Pōʻaono, e lawe ʻia kahi mea ʻai māmā, ka wai inu a e piha ka pahu kakalina o ke kaʻa.
Eia mai kā kākou ʻōlelo noʻeau,
Ka wahine ʻai lāʻau o Puna.
He ʻōlelo ia no Pele.
Ke Aolama 