09-21-18

ʻAkahi nō a hoʻomaopopo ʻia nā inoa o kekahi mau koa ʻelua mai loko mai o nā kinoa wailua he 55 i hoʻihoʻi ʻia mai e Kōlea ʻĀkau.

ʻO ia aʻela kekahi poʻo nūhou o kēia lā, ka lā 21 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.

I ka mahina ʻo Iulai, hoʻihoʻi ʻia maila nā kino wailua o nā koa he 55 e Kōlea ʻĀkau. A ma hope o ka noiʻi ʻana, loaʻa mai nei nā inoa o kekahi mau koa ʻelua. ʻO kekahi, he koa no ka Papa Kaua Koa Hele Wāwae 25. ʻO William Hoover Jones kona inoa, a he 19 ona makahiki i kona wā i make ai. He ʻApelika ʻAmelika ʻo ia ma kekahi māhele o ka papa kaua i hoʻokaʻawale ʻia ma muli o ka hoʻokae ʻili. A ʻo ka lua o ke koa, he kahu lapaʻau ʻo ia no ka Papa Koa Lapaʻau o ka Pūʻali Kau Lio 8. ʻO Charles McDaniel kona inoa, a he 32 ona makahiki i kona wā i make ai.

Hoʻāʻo aku nei kekahi kanaka e ʻaihue kanaka i kekahi kaikamahine e hoʻi ana i kona hale ma ke alanui ʻo Rusawela ma Kapolei ma kahi o ka hola 4:10 o ka ʻauinalā o ka Pōʻakolu nei. I ua kaikamahine nei e hele ana, kalaiwa akula kahi kanaka i kona kalaka a kū me ka haʻi ʻana i ke kaikamahine e kau pū. Hōʻole ihola ke kaikamahine, a laila, kalaiwa akula ke kanaka a ma kaʻe o ke alanui a hoʻāʻo e kaʻihuluhulu i ke kaikamahine a ma luna o ke kalaka. Ma ka pōmaikaʻi, hemo ihola ke kaikamahine a holo akula. Aia nō ka mākaʻi ke ʻimi aʻela i ke kolohe no ka hoʻāʻo ʻaihue kanaka, a ke noi ʻia nei ka lehulehu i ke kōkua ma ka ʻimi ʻana a loaʻa ia kanaka. ʻO kona lōʻihi, he ʻelima ona kapuaʻi me 6 ʻīniha. ʻO ka nui o kona mau paona, he 140 a ka 160 paha. He lauoho ʻeleʻele pōkole kona. A he ʻili kou kona.

Eia mai kā kākou ʻōlelo noʻeau,

Malu ke kula, ʻaʻohe keʻu pueo.

ʻO ia hoʻi, ua maluhia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s