11-02-18

He kino kupapaʻu kai loaʻa iho nei ma loko o kekahi pahu hoʻouna ma ka moku.

ʻO ia aʻela kekahi poʻo nūhou o kēia lā, ka lā 2 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.

Ma kahi noho o Kahaluʻu, Oʻahu, ua loaʻa iho nei kekahi kino kupapaʻu ma loko o kekahi pahu hoʻouna ma ka moku i nehinei. Ma kahi o ka hola 12:00 o ke awakea i loaʻa ai ia kino, a he mau ʻeha nō ko ia kino, a no laila, hoʻomaka aʻela ka mākaʻi e noiʻi. ʻAʻohe naʻe wahi mea a hōʻike mai o ka mākaʻi i kahi ʻike no ke kanaka i make.

A ma ka mokupuni ʻo Hawaiʻi, aia nō ka mākaʻi ke noiʻi akula i ka make ʻana o kekahi keiki o Kailua, Kona i ka Pōʻakolu nei. ʻO ke keiki, he ʻeono wale nō ona makahiki. He ulia paha kai ʻike ʻia ma kekahi hale papaʻi ma ke Alanui ʻo Manawaleʻa. A lawe ʻia akula ua keiki nei i ka Hale Kinai Ahi o Kailua, ua pau kona ʻike, a pau hoʻi kona lohe. A mai ia hale kinai ahi aku ʻo ia i lawe ʻia ai i ka Haukapila Kaiāulu o Kona. A ma laila i kūkala ʻia ai kona make ʻana ma kahi o ka hola 5:30 o ka ʻauinalā. Aia nō ka mākaʻi ke ʻimi akula i mau hōʻike i ʻike aku paha i kahi hoʻopaʻapaʻa a haunaele paha ma kahi o ka hale papaʻi.

Eia mai kā kākou ʻōlelo noʻeau,

Puka ma ka ʻāpua.

ʻO ia hoʻi, ua pakele māhunehune i ka pilikia.