10-31-18

Hoʻoholo ihola ka ʻAha Kiʻekiʻe o Hawaiʻi no ka TMT.

ʻO ia aʻela kekahi poʻo nūhou o kēia lā, ka lā 31 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ua kau aʻela ka ʻōlelo hoʻoholo a ka ʻAha Hoʻokolokolo Kiʻekiʻe o Hawaiʻi no ka pono o ka ʻOhe Nānā Kanakolu Mika i ka Pōʻalua nei, ʻo ia hoʻi, ua ʻāpono ihola i ka holo ʻana o ka manaʻo o ka Papa ʻĀina a Waiwai Pili ʻĀina i ka hoʻopuka ʻana i palapala kūkulu no ia papahana. He hoʻokahi wale nō lunakānāwai o ka ʻAha Kiʻekiʻe i kūʻē i ia ʻōlelo hoʻoholo, ʻo ia ka Mea Hanohano Michael Wilson. A hoʻohiki ihola nā Kū Kiaʻi Mauna, e alu like hou ma Mauna Kea. ʻŌlelo ihola ʻo Kahoʻokahi Kanuha, kekahi o nā Hawaiʻi Alakaʻi, hoʻokahi wale nō ala i koe, ʻo ia ke kū ʻana no ka pono, a ʻo ke Kapu Aloha ke kū i ka moku. Hōʻike mai ka hui ʻo TMT, inā he pilikia paha ke kupu aʻe, he wahi ʻē aʻe nō e kūkulu ʻia ai ua ʻohe nānā lā, ʻo nā Mokupuni Kenele.

Ma ka paio kālaimanaʻo ʻana o nā moho kiaʻāina, ua kono ʻia nā moho hope kiaʻāina kekahi. Hoʻokahi wale nō naʻe moho hope kiaʻāina i hiki aku, ʻo ia ka hoa alualu o David Ige, ʻo Josh Green. ʻAʻole i hiki aku ʻo Marissa Kerns, ka hoa alualu o Andria Tupola. Ua hili hewa paha kahi manaʻo lā. Hōʻike aʻela ke Poʻo Nūhou o KITV, ʻo Mike Darrah, ua haʻi aku ʻo KITV i nā moho kiaʻāina, e lawe i nā hoa alualu a ʻae maila lāua. Wahi a Kerns, ʻaʻole i hoʻomaopopo iki ʻo Tupola iā ia no kona kono ʻia ʻana. ʻŌlelo ihola ʻo Tupola i ka Pōʻalua nei ma ke alualu ʻana i ke kūlana mokuʻāina, e hili hewa ana ke kūkākūkā ʻana.

Eia mai kā kākou ʻōlelo noʻeau,

Ua Ikapoka, ua hala ka nani o ka ʻIkelaʻela.

ʻO ia hoʻi, ua hala ka Puʻulena.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s