Kī pū ʻia kekahi kanaka o Waikele e ka mākaʻi.
ʻO ia aʻela kekahi poʻo nūhou o kēia lā, ka lā 22 o Pepeluali, he Pōʻalima. Welina e nā makamaka. ʻO Ke Aolama kēia a penei ka nūhou.
Ua kī pū ʻia ihola kekahi kanaka e ka mākaʻi a lawe ʻia akula i ka haukapila ma ke kūlana kūpilikiʻi. He 37 makahiki o ua kanaka nei, a ua hele aku nei ʻo ia i ke keʻena o ka hui ʻo Advanced Collision Center ma Kakaʻako no ka ʻimi ʻana i kekahi limahana ma mua. E hoʻoweliweli ana ʻo ia i nā limahana o laila me ke kī ʻana i ka pū i ka honua, a hoʻāʻo akula e puhi aku i ia keʻena i ke ahi a pūhalahio aʻela. He ʻelua hola ma hope mai, ua loaʻa akula i ka mākaʻi ua kanaka lā e noho ana ma luna o kona kalaka ma kahi kūkulu kaʻa o kona wahi noho ma ke Alanui ʻo Lumiʻaina i Waikele. Kauoha akula nā mākaʻi e lele i lalo o ke kalaka. A hoʻomaka maila ua kanaka lā e hana pēlā, akā, i kona huli ʻana mai, e kau ana kāna pū i nā mākaʻi. A ʻo ia kona wā i kī pū ai kekahi mākaʻi iā ia, a kū ʻo ia i ka pōkā hoʻokahi a ʻoi aku paha. ʻO ka lua kēia o ka manawa i kī pū ai ka mākaʻi i ke kanaka ma nā lā ʻelua i hala iho nei, a ʻo ke kolu ma kēia pule nei.
Huki ʻia ka laikini kuhikuhi lāʻau kāohi ʻia o kekahi mau kauka he 41 ma Kaleponi, Nevada a me Hawaiʻi. He ʻelima o lākou, he mau kauka ma Hawaiʻi nei. Ma muli ia o ka noke ʻana o nā mākaʻi pekelala e hoʻopau i ka laha hewa ʻana o ka lāʻau ʻopiuma. Ma ʻAmelika Hui Pū ʻIa a puni, he 11 miliona mau kānaka a ʻoi i hei wale i ka lāʻau ʻopiuma, a he 130 mau kānaka make i ka pākela ʻai lāʻau ʻopiuma o kēlā lā kēia lā. Wahi a Kenji Price, ka loio ʻAmelika Hui Pū ʻIa o ka ʻĀpana ʻo Hawaiʻi, ma nā makahiki i hala iho nei, ʻo ka nui o nā kānaka make i ka pākela ʻai lāʻau ʻopiuma, ʻaʻole i nui loa e like me nā ʻāpana ʻē aʻe ma ʻAmelika Hui Pū a puni.
Eia mai kā kākou ʻōlelo noʻeau,
ʻUkuliʻi ka pua, onaona i ka mauʻu.
He ʻōlelo kēia no ke kanaka iki, he kama iki paha, e hauʻoli ai ka naʻau o nā kānaka ʻē aʻe.
Ke Aolama 