E hoʻonui ʻia paha ka hoʻopaʻi, ke piʻi kuahiwi ke kanaka ke pāpā ʻia.
ʻO ia aʻela kekahi poʻo nūhou o kēia lā, ka lā 25 o Pepeluali, he Pōʻakahi. Welina e nā makamaka. ʻO Ke Aolama kēia, a penei ka nūhou.
He pila hou ke kūkākūkā ʻia nei ma ka ʻAha Kenekoa no ka poʻe hele wāwae mamao a piʻi kuahiwi paha. ʻO ka Pila Kenekoa 248 ia, a e koi ana ia pila, e uku ka poʻe hele wāwae mamao ke komo hewa i ke ala piʻi kuahiwi o ke aupuni. ʻO ka hoʻopaʻi e kau ana, mai ka $500 a ka $1,000. A na ke komo hewa nō hoʻi e uku i ke kālā i hoʻolilo ʻia ma ka ʻimi ʻana a me ka hoʻopakele ʻana iā ia. Na ke Kenekoa Mike Gabbard i hāpai i ia pila ma muli o kona ʻike ʻana i ka nūhou no nā kānaka ʻehā i komo wale i ke ala piʻi i ka Wailele ʻo Mānoa. Ua pāpā ʻia, ʻaʻole e piʻi i uka o laila ma muli o ka hāneʻe ʻana o ka mauna. ʻO ka hoʻolilo ma ka ʻimi a hoʻopakele ʻana ke hoʻohana ʻia ka mokulele pinao, he $1,500 o ka hola. He manaʻo ko Gabbard, ʻo ka hoʻopaʻi ka mea e pau ai ka manaʻo o ke kanaka e piʻi kuahiwi ke pāpā ʻia. ʻO kekahi poʻe, he kākoʻo nō i ia pila, akā, ʻo kekahi, he kūʻē ma muli o ka manaʻo, inā kau ka hoʻopaʻi, ʻaʻole paha e noi ke kanaka i ke kōkua. A ʻo ka pōʻino auaneʻi paha ia o ke ola.
Aloha nō nā Wāhine Ānuenue. Ua eo lākou iā UCLA ma nā pāʻani he ʻelima i ke kakahiaka o nehinei ma ka pōpō paʻipaʻi kahakai. Ua lilo ke eo o nā pāʻani ʻelima iā UCLA, ka hui helu ʻekahi o ʻAmelika. ʻO Hawaiʻi ka hui helu ʻelima. Akā, ma ia hope mai, ua lanakila ʻo Hawaiʻi ma luna o Kanapoka, he ʻekolu lanakila, a he ʻelua hāʻule. ʻO UCLA ka inoa moho o ia hoʻokūkū, a ʻo Pepperdine ka helu ʻelua.
Eia mai kā kākou ʻōlelo noʻeau,
Mōhala maikaʻi ke oho o ke kupukupu.
He ʻōlelo kēia no ke kanaka nohea.
Ke Aolama 