Loaʻa aku nei paha i ka maʻi ma muli o ke kikaliki uila.
ʻO ia aʻela kekahi poʻo nūhou o kēia lā, ka lā, 11 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Aia nō ke noiʻi aku nei nā luna o ke Keʻena Ola i kekahi kanaka i manaʻo ʻia, ua loaʻa i ka maʻi kūkonukonu e pilikia ai ka hanu ʻana a me ke akemāmā. ʻO ke kanaka mua ia ma Hawaiʻi nei i hoʻohuoi ʻia, ua loaʻa i ia ʻano maʻi ma muli o ka puhi ʻana i ke kikaliki uila. He ʻōpiopio wale nō ʻo ia. Ua waiho ʻia he 450 mau hōʻike i mua o ke Kikowaena Hoʻomalu A Kāohi Maʻi, no nā kānaka i hele a maʻi loa i ke kikaliki uila. ʻO ka hapanui, ma muli ia o ka puhi ʻana i kekahi mea kanapinoika, e like hoʻi me ka THC, he mea no loko mai o ka pakalōlō. ʻŌlelo ihola ka Luna o ke Keʻena Ola, ʻo Bruce Anderson, aia nō ia keʻena ke aʻoaʻo aʻe nei i ka lehulehu no ia mea he kikaliki uila me ke aʻo pū ʻana aʻe, ʻaʻole e hoʻohana ʻia a puhi ʻia paha kekahi mea THC i ʻāpono ʻole ʻia. ʻO kekahi ʻōlelo a ke Keʻena Ola, ʻaʻole e kūʻai i nā mea kikaliki uila ma ka mākeke ʻeleʻele, ka mākeke kolohe hoʻi. A ʻaʻole e puhi kikaliki ka ʻōpiopio, ka wahine hāpai, a me nā kānaka makua puhi ʻole i ka paka a hoʻohana paha i nā mea paka.
A wahi a ka Pelekikena Donald Trump, e hāpai i ka manaʻo, e pāpā ʻia nā ʻano ʻono like ʻole o nā kikaliki uila, a koe ka ʻono paka. He mau kaukani ka nui o nā ʻano ʻono kikaliki uila, a manaʻo ʻia, ma muli o ia mau ʻano ʻono, māhuahua aʻela nā ʻōpiopio puhi kikaliki uila.
Eia mai kā kākou ʻōlelo noʻeau,
He maoli pua lehua kau i ka wēkiu.
He ʻōlelo kēia no ke kanaka uʻi.
Ke Aolama 