E hana ʻino ana paha ke aupuni mokuʻāina i nā Kū Kiaʻi Mauna.
ʻO ia aʻela kekahi poʻo nūhou o kēia lā, ka lā, 9 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
E hopu ʻia ana paha nā Kū Kiaʻi Mauna e kūpaʻa aku ana ma hope o ka ʻāina ma ke ala e hiki aku ai i luna o Maunakea. Pēlā ka ʻōlelo a nā Hawaiʻi Alakaʻi. ʻO kekahi ʻōlelo i lohe ʻia e nā Kū Kiaʻi Mauna, ʻo ia ka hele ʻana o nā koa he 800 o ka Pūʻalikoa Ukali o ka Mokuʻāina ʻo Hawaiʻi i laila, a wahi a Andre Perez, kekahi o nā Hawaiʻi Alakaʻi, ʻo ia ko lākou mea i kuhi ai, e hoʻāʻo ana ke aupuni mokuʻāina e suipa aku i nā kānaka e kū ana i ka pono i mea e keʻakeʻa ʻole ʻia ai ke ala e moe ana no luna o Maunakea. A mai kēia lā a i ka Pōʻakolu paha ko ke aupuni wā e hana ai pēlā. I ka Pōʻaono nei, ʻōlelo aʻela ʻo Harry Kim, ka meia o ke Kalana ʻo Hawaiʻi, ʻaʻole ʻo ia ʻike iki no ka suipa ʻia ʻana o ia wahi ma nā lā mua o kēia pule nei.
A ma Oʻahu nei i ka Lāpule nei, ʻike ʻia ke kākoʻo o nā kānaka i nā Kū Kiaʻi Mauna. ʻO ka hana, ua kaʻi like lākou ma nā kaʻa mai Maunalua a i Māʻili no ka hōʻike ʻana i ka lōkahi o ko lākou manaʻo me nā mea e kū kiaʻi ana ma luna o Maunakea. A ma nā uapo ma ia ala e moe ana no Māʻili, ʻike ʻia aku nei nā kānaka aloha ʻāina like ʻole e kākoʻo ana.
A lanakila aku nei ʻo Hawaiʻi ma luna o ʻOlekona Mokuʻāina ma ka pōpō pekupeku i ka Pōʻaono nei ma ka helu ʻai he 31 i ka 28. E ʻoi ana ʻo ʻOlekona ma ka helu ʻai he 28 i ka 7. A ma hope mai, hiu aʻela nā Koa Ānuenue a paʻa maila he ʻelua ʻai holo, a i ka hopena o ka hapahā ʻelua, he 28 ʻai a ʻOlekona i ka 21 ʻai a Hawaiʻi. Maikaʻi wale ka hana a ka ʻaoʻao kūpale o Hawaiʻi ma ka hapalua ʻelua. ʻAʻohe wahi ʻai i lilo aku iā ʻOlekona.
Eia mai kā kākou ʻōlelo noʻeau,
E ala! E alu! E kuilima!
He ʻōlelo kēia no ke kāhea ʻana i nā kānaka e alu like mai ma ka hana.
Ke Aolama 