09-18-19

E noiʻi ʻia paha ka hana kolohe a ke aupuni mokuʻāina.

ʻO ia aʻela kekahi poʻo nūhou o kēia lā, ka lā, 18 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.

Ke noi nei ʻo Puʻuhonua o Puʻuhuluhulu Maunakea, nā alakaʻi hoʻi o nā Kū Kiaʻi Mauna, i ka noiʻi ʻana i ka hoʻokō kānāwai ʻana o ke aupuni mokuʻāina me ke noi pū ʻana i ke kipaku ʻana i kekahi mākaʻi o Hawaiʻi moku a lākou e ʻōlelo ana, ua hoʻolaha aku i kahi ʻike hoʻopunipuni. A ua loaʻa kahi wikiō, kahi e ʻike ʻia ai kāna hana. He kapu aloha ko nā Kiaʻi, eia kā ke aupuni ke hoʻouluhua a hoʻomākaʻukaʻu nei iā lākou. Ke hana nei ke aupuni mokuʻāina, me he mea lā, he mau kānaka kū i ka hewa nā Kiaʻi. He hana maluhia wale iho nō naʻe kā nā Kiaʻi o ka Mauna. A no ka mākaʻi e manaʻo ʻia ana e kipaku ʻia mai ka ʻoihana mākaʻi, ʻo Justin Gaspar kona inoa, a e haʻi ana ʻo ia iā Michael Glendon, he Kiaʻi, i ke kumu i wāwahi ʻia ai ka hale i kūkulu ʻia. Akā, ʻaʻohe ʻoiaʻiʻo o nā ʻōlelo a Gaspar.

Aia nō ke ahi ke hōlapu aʻela ma ka moku lawaiʻa Miki Emma i kēia kakahiaka nei. I ka Pōʻalua nei i ʻā ʻia ai ke ahi ma loko o ka lumi ʻenekini. A ua kuhi ʻia, ma laila wale nō e lapalapa ai, eia naʻe, i loko o ka wā pōkole, lele ke ahi a puni ka moku. A haʻalele loa ihola nā kānaka ʻehiku o luna o ka moku, a lana ana ma ka waʻapā. A i ka hola 5:05 o ka ʻauinalā, loaʻa aku nei lākou lā i ke Kiaʻi Kai, he ʻewalu mile ma kai aku o Ko ʻOlina. ʻO ka pōmaikaʻi, ʻaʻohe ola i pōʻino.

Eia mai kā kākou ʻōlelo noʻeau,

E ala. e hoa i ka malo.

ʻO ia hoʻi, e ala, a e ʻaʻako aku i ka hana.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s