Pōmaikaʻi kekahi mau kula aupuni o Hawaiʻi nei.\
ʻO ia aʻela kekahi poʻo nūhou o kēia lā, ka lā 20 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.
Ua makana aku ka hui ʻo Servco Pacific i nā pila a me nā mea aʻo mele i kekahi mau kula aupuni o Hawaiʻi nei. ʻO ka nui o nā pila, he 2,000 ʻukulele a he 750 kīkā. A ʻo ka waiwai ʻiʻo o nā mea a pau, he $500,000 a emi iki mai. E piha ana nā makahiki haneli iā Servco Pacific i kēia makahiki nei. A no laila, ua kono aku i nā kula aupuni a me nā kula hoʻāmana, e noi i mau pila ma ke koho ʻana i kumu kula nāna e hoʻokumu a mālama mau i papahana mele ma kona kahua kula i nā hola kula a ma hope paha o ke kula. ʻO ka nui o nā kula i noi, he 55, ua hoʻokō ʻia nā noi a pau.
Hōʻike aʻela ka Meia Harry Kim no kāna mea e hoʻolālā nei no Maunakea, a wahi āna, ʻo ke kūkulu ʻia ʻana o ka ʻOhenānā Kanakolu Mika, ʻo ia kekahi ma ia hoʻolālā ʻana. A ʻōlelo aʻela ʻo Kahoʻokahi Kanuha, kekahi o nā Hawaʻi Alakaʻi o nā Kū Kiaʻi Mauna, inā pēlā ka hoʻolālā ʻana a Kim, pehea lā i manaʻo ai ʻo Kim, ʻo ia ka makemake o nā kānaka, a pehea hoʻi ia e hoʻoponopono ai i ka pilikia e kū nei, ʻo ia hoʻi, ʻo ke kūkulu ʻia ʻana o ka ʻOhenānā Kanakolu Mika.
Eia mai kā kākou ʻōlelo noʻeau,
E kaupē aku nō i ka hoe a kō mai.
ʻO ia hoʻi, e noke i ka hana a pau pono.
Ke Aolama 