E laha auaneʻi paha ka maʻi ʻulāliʻi ma Kāmoa.
ʻO ia aʻela kekahi poʻo nūhou o kēia lā, ka lā 18 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ma Kalaeloa, ʻākoakoa aku nei nā kānaka no ka ʻākeʻakeʻa ʻana i ka hiki ʻana aku o nā pono o nā wili makani hana uila. I ka hola 9:00 o ka pō Lāpule nei, he 100 mau kānaka, a kuhi ʻia ihola, he mau kānaka hou ke hele aku ana i laila. I ka Pōʻahā nei, hopu ʻia iho nei he 26 mau kānaka no ka hoʻolohe ʻole ʻana i ke kauoha a ka mākaʻi.
Ua make iho nei he ʻeono mau kānaka i ka ʻulāliʻi ma Kāmoa, ʻo ka hapanui o lākou, he mau kama iki wale nō, he ʻelua makahiki a emi mai. A ma muli o kēlā, kūkala ʻia aʻela, he wā ulia pōpilikia kēia no ia aupuni. Ua pani ʻia ihola nā kula a pau o Kāmoa, a pāpā ʻia nō hoʻi nā keiki, ʻaʻole e hele aku i kahi e ʻākoakoa ai ka lehulehu, a kēnā ʻia nā kānaka a pau, e ʻō ʻia i ka lāʻau pale ʻulāliʻi. Ua helu ʻia he 716 mau kānaka i loaʻa i ka maʻi ʻulāliʻi, a he 100 a emi mai, aia nō ke noho maʻi akula ma ka haukapila. Ua emi loa nā pēpē i ʻō ʻia i ka lāʻau pale ʻulāliʻi ma Kāmoa. I ka makahiki 2013, ua ʻoi aku i ke 70 pākeneka, a i kēlā makahiki aku nei, ua emi iho i ke 30 pākeneka.
Aloha nō. Ua hemo ihola ke kīkala ʻākau o Tua Tagovailoa i ka Pōʻaono nei ma ke kūʻē ʻana aku o Alabama iā Mikikipi Mokuʻāina. I ka wā i ʻeha ai ʻo Tagovailoa, e ʻoi ana ʻo Alabama, ma ka helu ʻai he 35 i ka 7. Ma ka hapalua mua ia, a e huki ʻia ana ʻo Tagovailoa mai ka pāʻani ʻana, akā, holo ihola ka manaʻo o Nick Saban, e pāʻani ʻo ia i mea e hoʻomaʻamaʻa ai i ka pāʻani ʻana i ka wā he ʻelua wale nō minuke i koe ma ka hoʻokūkū. A ʻo ia kona wā i hōʻeha ʻia ai. Ma mua o kēlā, he maikaʻi wale ka pāʻani ʻana o Tagovailoa, he 256 āna ʻīā i nou ai a he ʻelua āna ʻai holo i nou ai. ʻAʻole ʻo ia e pāʻani hou i kēia kikina. Ua kuhi ʻia, ʻo Tagovailoa kekahi o nā mea pāʻani pōpō peku mua o nā kulanui o ʻAmelika e koho ʻia ana ma ka lā wae mea pāʻani o ke Kuʻikahi Pōpō Peku Aupuni ma ka mahina ʻo ʻApelila.
Eia mai kā kākou ʻōlelo noʻeau,
Komo mai kāu māpuna hoe.
ʻO ia hoʻi, e kōkua.
Ke Aolama 