11-25-19

Pōmaikaʻi nā limahana o ke Keʻena Hoʻonaʻauao o Hawaiʻi.

ʻO ia aʻela kekahi poʻo nūhou o kēia lā, ka lā 25 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou,.

Ke hiki aku i ke kau kupulau o ka makahki 2020, e hiki ana i nā limahana o ke Keʻena Hoʻonaʻauao ke komo i ka papa ʻōlelo Hawaiʻi ma nā kulanui kaiāulu o ke Kulanui o Hawaiʻi. A ʻo ka mea pōmaikaʻi, ʻaʻohe uku komo. He 22,000 mau limahana. A ʻo nā kumu aupuni kekahi ma loko o ia pūʻulu. Ke alu like nei ke Keʻena Hoʻonaʻauao Hawaiʻi o ke Keʻena Hoʻonaʻauao me nā kulanui kaiāulu o ke Kulanui o Hawaiʻi. He ʻelua koho, ʻo ka mua, ʻo ke komo ʻana i kekahi o nā papa maʻa mau o ke kau, a ʻo ka lua, ʻo ke komo ʻana i kekahi papa i hoʻokumu ʻia no nā limahana o ke Keʻena Hoʻonaʻauao. ʻO ka poʻe kumu aupuni, e lilo iā lākou ka ʻai hoʻomohala ʻoihana. A ʻo nā limahana ʻē aʻe, e lilo iā lākou ka ʻai kulanui.

Ma Kāmoa, ua hiki akula ka nui o nā kānaka i make i ka ʻulāliʻi i ka 25. A he 24 o lākou, he mau kamaliʻi wale nō. A ʻo ka mea hope loa, he kanaka makua nona nā makahiki he 30 a ʻoi. A mai ka lā i nehinei a i kēia lā, he 140 mau kānaka hou i loaʻa i ua maʻi ʻino lā. A ʻo ka huina pau o nā kānaka i loaʻa i ka ʻulāliʻi mai kona lā mua i ʻōʻili ai i kēlā mahina aku nei, he 2,200 a ʻoi aku a emi mai paha. I kēia manawa, he 20 keiki a ʻoi aku a emi mai paha e waiho wale ana ma ke kūlana kūpilikiʻi.

Eia mai kā kākou ʻōlelo noʻeau,

Puʻuwai hao kila.

ʻO ia hoʻi, he wiwo ʻole.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s