12-02-19

Aloha nō ko Kāmoa.

ʻO ia aʻela kekahi poʻo nūhou o kēia lā, ka lā 2 o Kēkēmapa, he Pōʻakahi. Welina e nā makamaka. ʻO Ke Aolama kēia a penei ka nūhou.

ʻO ka nui o nā kānaka i make i ka ʻulāliʻi ma Kāmoa, he 53 lākou. Hoʻokahi o lākou, he kanaka makua. A ʻelua o lākou, he mau ʻōpoiopio. ʻO ka nui o nā keiki i make, he hoʻokahi makahiki a emi mai, he 23 lākou. A ʻo nā keiki i make, he hoʻokahi makahiki a ka hā o ka makahiki, he 25 lākou. Mai ka wā i laha iho nei ia maʻi ʻulāliʻi ma Kāmoa, he nui nā kānaka i hoʻomoe ʻia ma ka haukapila, he 1,100 a ʻoi. A ma kahi o ka 180 o lākou, aia nō ke waiho akula ma ka haukapila a hiki i kēia lā. A he 19 o lākou, he mau keiki e waiho ana ma ke kūlana kūpilikiʻi.

ʻO nā Wāhine Ānuenue o Hawaiʻi kekahi e kūʻē ana ma ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika Hui Pū ʻIa. A ʻo ko lākou wahi e pāʻani ai ma ka puni mua, ʻo Hawaiʻi nei nō ia. E kūʻē ana ʻo Hawaiʻi iā Kololako ʻĀkau i ka hola 7:00 o ke ahiahi Pōʻalima. A ma kekahi hoʻokūkū ma Hawaiʻi nei, e kūʻē ana ʻo Kāna Kieko iā Wakinekona Mokuʻāina ma ka hola 4:30 o ka ʻauinalā ma mua mai o ia hoʻokūkū o Hawaiʻi. A ʻo nā lanakila o ia mau hoʻokūkū a i ʻelua, ʻo lāua ke hui pū a kūʻē. Ma Hawaiʻi nei nō hoʻi ia hoʻokūkū i ka hola ʻehiku o ka Pōʻaono. A ʻo ka lanakila o ia hui ʻana, ʻo ia ke holo mua i ka puni ʻekolu.

Eia mai kā kākou ʻōlelo noʻeau.

Pipī ka wahie, hoʻonui ka pulupulu.

ʻO ia hoʻi, mai hāʻawi pio, e noke aku i ka hana a kō ka makemake.