Hōʻeha hou wale ʻia kekahi mau luāhine ʻĀkia.
ʻO ia aʻela kekahi poʻo nūhou o kēia lā, ka lā 7 o Mei, he Pōʻalima. Welina e nā makamaka. ʻO Ke Aolama kēia a penei ka nūhou.
Ua hoʻopiʻi ʻia ʻo Patrick Thompson o Kapalakiko no ka hoʻāʻo pepehi kanaka i ka Pōʻahā nei. Ua hou akula ʻo Thompson i kekahi mau luāhine ʻĀkia ʻelua i ka pahi i ko lāua wā e kali ana ma kekahi wahi kau kaʻa ʻōhua ma Kapalakiko. ʻO kekahi wahine, he 65 ona makahiki, a ʻo kekahi, he 84 ona makahiki. ʻO Thompson, he 54 ona makahiki, a ua ʻōlelo ʻia, he maʻi noʻonoʻo kona. Inā hoʻāhewa ʻia ʻo Thompson, ʻo ka hoʻopaʻi kanono loa paha e kau aku nona, ʻo ka noho paʻahao a pau kona ola.
Lanakila aku nei ʻo Berigana Iana ma luna o Lewis i ka Pōʻahā nei ma loko o nā pāʻani ʻehā. A no laila, e kūʻē ana nā Koukā i nā Koa Ānuenue i ka Pōʻaono ma ka puni wae moho o ka Hoʻokūkū Inoa Moho Pōpō Paʻipaʻi o ka ʻAhahui ʻĀlapa o nā Kulanui o ʻAmelika. Ma ka lanakila o ka pō nei, he 17 hoʻopio a Gabi Garcia Fernandez o BYU. A he 11 hoʻopio a Davide Gardini, a pēlā hoʻi ʻo Zach Eschenberg. A ʻo Wil Stanley, ua puka mai ke Kula Kiʻekiʻe ʻo Punahou, he 43 āna hānai.
Eia mai kā kākou ʻōlelo noʻeau,
He iʻa kokoke kā ka lawaiʻa.
He ʻōlelo kēia no ke kanaka i hiki ke hoʻokō i kona makemake ma muli o kona akamai.
Ke Aolama 