He hoʻokae ʻili kā ka poʻe o Maikonekia e ʻike nei ma Hawaiʻi nei.
ʻO ia aʻela kekahi poʻo nūhou o kēia lā, ka lā 10 o Mei, he Pōʻakahi. Welina e nā makamaka. ʻO Ke Aolama kēia a penei ka nūhou.
Hōʻike aʻela kekahi makua ʻuhane Kakolika, he nui nā ʻōlelo makawela no Iremamber Sykap, he ʻōpio i kī ʻia e ka mākaʻi i ka pū a make. No Chuuk ka ʻohana o Sykap, akā, ua hānau ʻo ia ma Guama, he panalāʻau no ʻAmelika Hui Pū ʻIa, a he ʻAmelika ʻo ia, wahi a Yovita Sykap, ka makuahine o Iremamber. ʻŌlelo ana kekahi mau kānaka Maikonekia, he nui ko lākou hoʻokae ʻili ʻia ma Hawaiʻi nei. A ʻo ia kī ʻia ʻana a make ʻo Sykap, ʻo ia kekahi. He 15,000 mau kānaka Maikonekia a ʻoi ma Hawaiʻi nei a manaʻo ihola lākou, e ʻoluʻolu ana ko Hawaiʻi iā lākou, ʻoiai, no kekahi mokupuni lākou o ka moana nui ākea, ʻaʻole naʻe pēlā.
He mau wahi nā hale wai a me nā hale paʻahao e lele wale ai ka maʻi ahulau akā, he ʻehā mahina ma hope mai o ka hoʻolako ʻia ʻana o ka lāʻau koʻokoʻo, emi loa nā paʻahao e ʻō ʻia nei i ia lāʻau koʻokoʻo. He 1,075 paʻahao o Hawaiʻi ma ka Hale Paʻahao ʻo Saguaro ma ʻAlikona, a he 236 wale nō paʻahao i ʻō ʻia i ka māhele hoʻokahi a i nā māhele ʻelua paha o ka lāʻau koʻokoʻo, he 20 wale nō pākeneka. ʻO kahi mea minamina, ʻaʻole e mālama ʻia nei nā helu o nā paʻahao o Hawaiʻi e ʻō ʻia nei i ka lāʻau koʻokoʻo. A pēlā pū me nā helu o nā paʻahao i ʻō ʻia i ka māhele hoʻokahi a i nā māhele ʻelua paha.
Eia mai kā kākou ʻōlelo noʻeau,
He iwi koko.
ʻO ia hoʻi, he kanaka e ola ana.
Ke Aolama 