10-13-21

Lilo aku nei kekahi i ke kai a nalowale.

ʻO ia aʻela kekahi poʻo nūhou o kēia lā, ka lā 13 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

I ka Pōʻakahi nei, lilo aku nei kekahi kanaka i ke kai o Makapuʻu. ʻO Malik Dobson kona inoa. Hoʻomaka akula ka ʻimi ʻana aʻe o ke Keʻena Kinai Ahi a me nā Kiaʻi Ola iā Dobson ma kahi o ka hola 4:00 o ka ʻauinalā o ka Pōʻakahi nei. A pau ihola ka ʻimi ʻana i ka ʻumi kūmāono minuke i hala ka hola ʻeono o ke ahiahi ma muli o ka napoʻo ʻana o ka lā. A e ʻimi hou ʻia aʻe ana ʻo Dobson i ka lā i nehinei, akā, ua hoʻōki ʻia no ka maikaʻi ʻole o ke ʻano o ka manawa, he nāwele hoʻi ka ʻike ʻana. A hoʻomaka hou ihola i ke kakahiaka nei. ʻO ke Kiaʻi Kai kekahi ma ka ʻimi ʻana.

E hele ana nā Koa Ānuenue i Reno e kūʻē aku ai iā Nevada ma ka pāʻani pōpō peku. A ʻōlelo ihola ʻo Todd Graham, e pāʻani ana paha kāna mau ʻalihikūlele ʻelua, ʻo ia hoʻi, ʻo Chevan Cordeiro lāua ʻo Brayden Schager. ʻAʻole i komo ʻo Cordeiro i ka hoʻokūkū i ka lā 2 o ʻOkakopa ma ka ʻāʻumeʻume ʻana me Fresno State ma muli o ka ʻeha o kona kino. A ʻo Schager kai hoʻopiha i ka mākālua, a ua maikaʻi wale kāna hana. ʻO kahi pilikia paha, he wā anuanu loa kēia ma Nevada. I kēia Pōʻaono, ka lā hoʻi o ka hoʻokūkū, he kanahā kekelē a ʻoi iki paha.

Eia mai kā kākou ʻōlelo noʻeau,

Hele kā hoʻi a hiki i Keālia, ua napoʻo ka lā.

He ʻōlelo kēia no ke kanaka hoʻopaneʻe i ka hana.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s