10-11-21

Nei ana ke ōlaʻi ma Hawaiʻi nei.

ʻO ia aʻela kekahi poʻo nūhou o kēia lā, ka lā 11 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hoʻonāueue ke ōlaʻi i nā mokupuni o Hawaiʻi i ka ʻumi kumamākahi minuke i koe, kani ka hola 12:00 o ke awakea o ka Lāpule nei. ʻO ka ikaika o ia ōlaʻi, he 6.2. A ʻo ke kiko ōlaʻi, aia nō he 17 mile ma ka hema a me ka hikina hema o Nāʻālehu a he 64 mile ma ka hema a me ka hikina hema o Kailua-Kona. ʻAʻole i piʻi mai ke kai hoʻēʻe. Wahi a Ken Hon, ʻaʻole i pili ke ōlaʻi i ka luaʻi ʻana o ka pele ma Kīlauea. ʻO ke kekeʻe ʻana paha ia o ka una honua ma muli o ke kaumaha o ka pae ʻāina ʻo Hawaiʻi, a ʻo ia ke kumu i ʻike ʻia ai ma nā mokupuni a pau.

ʻĀkoakoa aku nei kekahi mau kiaʻi o Mauna Kea he haneli a ʻoi ma ke Kulanui o Hawaiʻi ma Mānoa i ka Pōʻalima nei, ʻoiai, he makemake nō ke Kulanui o Hawaiʻi e kūkulu ʻia ka ʻOhe Nānā Kanakolu Mika ma Mauna Kea i loko o ka nui o nā kūʻē ʻana ma nā makahiki i hala iho nei. ʻO kekahi ʻōlelo i kūkala ʻia e nā mea nāna i hoʻolālā i ia kū kiaʻi mauna ʻana, ua hōʻike ke Kulanui o Hawaiʻi, he haku maikaʻi ʻole ia no kēia mau ʻāina ʻano nui no nā makahiki he 50 a ʻoi a ʻo kā lākou papa hana no kēia hope aku o Mauna Kea, he hōʻoia ia, ʻaʻole lākou e hoʻolono mai ana a ʻaʻohe hoʻi lākou nānā i ka pōʻino o nā Kānaka Maoli a me nā kānaka aloha a kiaʻi mauna e hiki mai ana ke hoʻomau ʻia ke kūkulu ʻana ma luna o Mauna Kea. ʻŌlelo ihola nā mea kūkulu ʻohe nānā kanakolu mika, ʻaʻole e hoʻomaka ke kūkulu ʻana i kēia mau makahiki ʻelua e hiki mai ana a ʻoi aku paha, ʻoiai, he pono ka manawa e hoʻoponopono ʻia ai ka pilina me ke kaiāulu a no ka pilikia i ka maʻi ahulau.

Eia mai kā kākou ʻōlelo noʻeau,

He aliʻi ka ʻāina; he kauā ke kanaka.

ʻO ia hoʻi, he mea nui ka ʻāina, a he pono ke mālama ʻia e ke kanaka.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s