He kanaka hou kai make i ke kī pū ʻia.
ʻO ia aʻela kekahi poʻo nūhou o kēia lā, ka lā 21 o Malaki, he Pōʻakahi. Welina e nā makamaka. O Ke Aolama kēia a penei ka nūhou.
Ua lū ʻia aku nei nā lehu o Colt Brennan ma Waikīkī i ka Lāpule nei. Nui nō nā kānaka i hele aku i kahakai o Waikīkī no ka hāʻawi aloha ʻana iā Brennan, ʻo kona mau hoa pāʻani ma mua, ʻo kāna mau kumu pōpō pekupeku, a pēlā pū me nā kānaka like ʻole.
I ka Pōʻaono nei, make iho nei kekahi kanaka i ke kī pū ʻia ma Waikīkī. Ua hopu ʻia ʻo Justice Manumalo Kaio no kona hoʻohuoi ʻia, nāna i kī pū aku i ua kanaka lā. ʻO ke kolu ia o ke kanaka i make i ka pū ma Oʻahu nei ma nā lā ʻeono wale nō i kaʻa hope aku nei. A ma ka wanaʻao Pōʻalima nei, ua make ʻo Haʻaheo Kolona i ke kī pū ʻia ma ʻUalakaʻa. Manaʻo ʻia, na Nainoa Damon ke kī ʻana aku i ka pū. A ma kēlā Pōʻalua aku nei ma Waiʻanae, make ihola kekahi kanaka i ke kī pū a ʻeha ihola he ʻekolu mau kānaka.
Ma ke kakahiaka o ka Lāpule nei, ma kahi o ka hapalua hola ʻehiku, nei ihola ke ōlaʻi ma Waikoloa ma ka moku o Keawe. ʻO kona ikaika, he 4.5. Aia nō ke ōlaʻi he 13 mile ma ka hema-komohana hema o Waimea. A he 14 mile ka hohonu.
Eia mai kā kākou ʻōlelo noʻeau,
Hele wale a lulu i nā manu.
ʻO ia hoʻi, he nui lehulehu nā kānaka.
Ke Aolama 