Holo mua aku nei nā Kāne Ānuenue o Hawaiʻi ma ka hoʻokūkū inoa moho o ka ʻAhahui Komohana Nui.
ʻO ia aʻela kekahi poʻo nūhou o kēia lā, ka lā 11 o Malaki, he Pōʻalima. Welina e nā makamaka. ʻO Ke Aolama kēia a penei ka nūhou.
Ma Kaleponi i ka Pōʻakolu nei, hopu ʻia aku nei nā kānaka ʻelua i hoʻohuoi ʻia, na lāua nō i hoʻomake aku i kekahi kanaka ma kona hale ma ke Kualapa ʻo Hawaiʻiloa ma Niu. Ke kuhi ʻia iho nei, ʻo Gary L. Ruby ka inoa o ke kanaka i make. ʻO nā inoa o ia mau kānaka ʻelua i hopu ʻia, ʻo ia ʻo Juan Tejedor Baron lāua ʻo Scott Hannon. ʻŌlelo aʻela ke Keʻena Mākaʻi o Honolulu, he mau ipo ʻo Baron lāua ʻo Ruby. Ua hoʻokuʻu ʻia ʻo Hannon i ka Pōʻahā nei, no ka lawa ʻole o ka hōʻike e hoʻopiʻi ʻia ai ʻo ia. A ʻo Baron, ʻo ia mau paʻa nō a e hoʻihoʻi ʻia mai ana i Oʻahu nei.
Holo mua aku nei nā Kāne Ānuenue i ka puni wae moho o ka Hoʻokūkū Inoa Moho Pōpō Hīnaʻi o ka ʻAhahui Komohana Nui. Lanakila aku nei ʻo Hawaiʻi ma luna o Riverside ma ka helu ʻai he 68 i ke 67. He 16 wale nō kekona i koe a kani ka pū, e ʻoi ana ʻo Hawaiʻi ma ka helu ʻai he 68 i ke 65. A i ia manawa, ʻaʻe akula ʻo Hawaiʻi iā Dominick Pickett a he 6.1 kekona i koe. Komohia aʻela nā kī noa ʻelua a Pickett. A aia ka pōpō iā Junior Madut o Hawaiʻi, a ʻaʻe ʻia ʻo ia, he 5.2 kekona i koe. Akā, hala ke kī noa a Madut a lālau akula ʻo Riverside i ka pōpō a kī akula ʻo Wil Tattersall i ke kī kolu, ʻaʻole naʻe i komohia. E kūʻē ana ʻo Hawaiʻi iā Cal State Fullerton i kēia ahiahi. A ʻo ka lanakila, e holo mua ana i ka puni inoa moho.
Eia mai kā kākou ʻōlelo noʻeau,
Ua hala ka hoʻoilo, ua mālie.
ʻO ia hoʻi, ua pau ka pilikia. A ua maluhia ka ʻāina.
Ke Aolama 