04-22-22

Kau ana ʻo Piʻikea Lopes i ka hano hāweo.

ʻO ia aʻela kekahi poʻo nūhou o kēia lā, ka lā 22 o ʻApelila, he Pōʻalima. Welina e nā makamaka. ʻO Ke Aolama kēia a penei ka nūhou.

ʻO Piʻikea Kekīhenelehuawewehiikekauʻōnohi Lopes ka Miki Aloha Hula. He mea hula ʻo ia no Ka Lā ʻŌnohi Mai O Haʻehaʻe, a ʻo kona mau mākua nā kumu hula, ʻo Tracie lāua ʻo Keawe Lopes. A ʻo ka ʻolu o ke kino i ka hula, he welo paha ia no ia ʻohana. ʻO ka makuahine, ʻo Tracie nō kekahi i lilo, ʻo ia ka Miki Aloha Hula o ka makahiki 1994. Ua lilo nō hoʻi ka Makana ʻŌlelo Hawaiʻi iā Piʻikea, a ʻo ka nui o kāna mau ʻai he 50, ka palena nui o nā ʻai. Hoʻomaikaʻi iā ʻoe, e Piʻikea. A ma ke kūlana ʻelua, ʻo Auliʻionāpualokekūonaona Jon-Marie Hisayo Faurot o ka Hula Hālau ʻO Kamuela. A ma ke kūlana ʻekolu, ʻo Marina Laʻakea Choi o ka Hālau Hiʻiakaināmakalehua. A ma ke kūlana ʻehā, ʻo Manaia Kawaipuamakanakauʻikawēkiumekanoe-uʻiokeolamaikalaniākea Dalire Moe o Hālau Ka Liko Pua O Kalaniākea. A ma ke kūlana ʻelima, ʻo Kyleigh Hōkūao Manuel-Sagon o ka Hālau Kekuaokalāʻauʻalaʻiliahi.

Hopu ʻia aku nei kekahi kanaka i ka pō Pōʻalua nei no ka hoʻohuoi ʻia, ua pepehi aku nei ʻo ia i kona makuahine a make ma ke Alaloa ʻo Farrington. ʻO Joshua N. McPeek ka inoa o ua kanaka lā. A he ʻumi kūmāiwa ona makahiki. Ua ʻōlelo aʻela ka Lukānela Deena Thoemmes o ke Keʻena Mākaʻi o Honolulu, e hoʻopaʻapaʻa ana ka mea i hoʻohuoi ʻia a me ka luaahi ma mua o ka pepehi ʻana. A ʻōlelo ʻia nō hoʻi e ka mākaʻi, kohu mea lā, me ka lima nō i pepehi aku ai ʻo McPeek, ʻaʻohe wahi mea a hoʻohana ʻia o ka mea hōʻeha. I ka wā i hopu ʻia ai ʻo McPeek, haʻi akula ʻo ia i nā mākaʻi, ʻaʻohe ona hoʻomaopopo iki i ka limanui ʻana i kona makuahine.

Ma ka puni mua o ka Hoʻokūkū Inoa Moho Pōpō Paʻipaʻi o ka ʻAhahui Komohana Nui, lanakila aku nei ʻo Irvine ma luna o Kāna Kieko ma loko o nā pāʻani ʻekolu wale nō. A no laila, e holomua ana ʻo Irvine i ka puni ʻelua, kahi e kūʻē aku ana iā Kekaha Loa. A ma hope o ka pāʻani hahana ʻana, e holomua ana ʻo Kāna Palapala i ka puni ʻelua, kahi e kūʻē mai ana iā Hawaiʻi. A ʻo nā lanakila ʻelua, e ʻāʻumeʻume ana ma ka puni inoa moho ma ka Pōʻaono.

Eia mai kā kākou ʻōlelo noʻeau,

He ipu hoʻoilina mai nā kūpuna mai.

He ʻōlelo kēia no ka pūʻao.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: