Ua leʻa hou ka hula i ka hoʻopaʻa i ka hopena pule nei ma Hilo.
ʻO ia aʻela kekahi poʻo nūhou o kēia lā, ka lā 24 o ʻApelila, he Pōʻakahi. Welina e nā makamaka. ʻO Ke Aolama kēia a penei ka nūhou.
Piha hauʻoli ka naʻau i ka hele hou o nā kānaka mākaʻikaʻi i ka hoʻokūkū hula ʻo ka Merrie Monarch. A ʻo ka helu ʻekahi o nā poʻokela, ʻo ia ʻo Ka Lei Mokihana O Leinaʻala o Kalāheo ma Kauaʻi. A ʻo ke kumu hula, ʻo ia ʻo Leinaʻala Pavao Jardin. A lilo nō hoʻi i nā wāhine a Jardin ka makana helu ʻekahi ma ka hula ʻauana a me ka hula kahiko. A ʻo ka helu ʻelua o nā poʻokela, ʻo ia ʻo Ka Lā ʻŌnohi Mai O Haʻehaʻe. A ʻo Tracie lāua ʻo Keawe Lopes nā kumu hula. A ʻo ka helu ʻekolu o nā poʻokela, ʻo Hula Hālau ʻO Kamuela. A ʻo Kūnewa Mook lāua ʻo Kauʻionālani Kamanaʻo nā kumu hula.
Lilo aku nei ka inoa moho pōpō paʻipaʻi o ka ʻAhahui Komohana Nui i nā Kāne Ānuenue ma hope o ka lanakila ʻana aku nei ma luna o Kekaha Loa i ka pō Pōʻaono nei. A no laila, ʻo Hawaiʻi kekahi ma ka hoʻokūkū inoa moho o ka ʻAhahui ʻĀlapa o nā Kulanui o Amelika Hui Pū ʻIa e mālama ʻia ana ma ke Kūlanakauhale o nā ʻĀnela. E hoʻāʻo ana ʻo Hawaiʻi e kāʻili hou i ka inoa moho. ʻO nā Ānuenue ka inoa moho o kēlā makahiki aku nei. E kūʻē ana ʻo North Greenville iā Princeton i ka lā 3 o Mei. A ʻo ka lanakila o ia hoʻokūkū, ʻo ia ke kūʻē ana iā Hawaiʻi ma ka puni ʻelua.
Aloha nō. Ma ka pō mokomoko ʻo Bellator 279 o ka pō Pōʻaono nei, ua eo iho nei ʻo ʻIlima-Lei Macfarlane iā Justine Kish. ʻAkahi a mokomoko hou ʻo Macfarlane ma hope o ka lilo ʻana aku nei o ka inoa moho honua 125 paona ma ka mahina ʻo Kēkēmapa o ka makahiki 2020. Ma ka ʻaoʻao pōmaikaʻi, ua lanakila kahi keiki o Mākaha, ʻo Yancy Medeiros, ma luna o Emmanuel Sanchez.
Eia mai kā kākou ʻōlelo noʻeau,
Ka ʻai nānā i luna.
ʻO ka ʻulu ia. ʻO ke kalo, ka ʻuala a me ka uhi, aia ka hua ma lalo o ka honua.
Ke Aolama 