Nui loa ke kalepona diokaside ma kekahi mau lumi papa o Oʻahu nei.
ʻO ia aʻela kekahi poʻo nūhou o kēia lā, ka lā 3 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.
He 73 mau lumi papa ma nā kula aupuni o Oʻahu nei, nona ke kalepona diokaside nui loa, ʻo ia hoʻi, ʻaʻole maikaʻi ka hoʻokomo ea ʻana ma ia mau lumi papa. A he mea hoʻi ia e laha ai ka maʻi kolona. He ʻehiku mau kula, ʻo nā Kula Haʻahaʻa o Kauluwela, o Keoneʻula, o Puʻuhale a me Royal, ʻo ke Kula Waena o Mililani, a ʻo nā Kula Kiʻekiʻe o Mililani a me Makinalē. He mea koʻikoʻi kēia, ʻoiai, i kēia pule, e hoʻi aku ana nā haumāna kula aupuni he 160,000 paha i nā kahua kula, a pēlā pū nō me nā limahana manawa piha, a hapa manawa nō hoʻi he 42,600 a ʻoi a ʻaʻole he koina ke komo ʻana i ke pale ihu. Hōʻike aʻela ka ʻOihana Hoʻonaʻauao, ua hoʻomaka ka hana e pono ai ka hoʻokomo ea ma ia mau lumi papa. ʻO kekahi nīnau naʻe i hāpai ʻia, he aha lā ke kumu i ʻūlōlohi ai ka hana, ʻoiai, ua hala he ʻumi kūmākahi mahina mai ka manawa mai i hoʻomaka ai ke ana ʻana i ke kalepona diokaside.
Hiki aku nei ka Luna Hoʻomalu o ka Hale o nā Lunamakaʻāinana o ʻAmelika Hui Pū ʻIa, ʻo Nancy Pelosi, i Taiwana i ka pō Pōʻalua nei. ʻO ia ka luna koʻikoʻi loa o ʻAmelika i kipa aku i ia aupuni ma nā makahiki he 25 i kaʻa hope aku nei. Ke ʻōlelo paʻa nei ʻo Kina, he panalāʻau ʻo Taiwana nona a he kūʻē ko Kina i ka launa ʻana o nā luna aupuni o Taiwana me nā aupuni o nā ʻāina ʻē. A ma hope o ka hiki ʻana aku o Pelosi mā i ka mokupuni ʻo Taiwana, kūkala aʻela ʻo Kina i nā hana pūʻalikoa e mālama ʻia ana a puni ua mokupuni lā me ke komo pū ʻana i ke kai o Taiwana. A kūʻē ʻo Taiwana i ia mau hana me ka ʻōlelo pū ʻana aʻe, he hehikū ia i ke ea o ia mokupuni. Inā he mea nui ke ea o Taiwana i nā luna aupuni o ʻAmelika Hui Pū ʻIa, ʻo ka hoʻihoʻi mai paha koe o ke ea o Hawaiʻi.
Eia mai kā kākou ʻōlelo noʻeau,
I ke alo nō ka ulu a hala.
ʻO ia hoʻi, i kekahi manawa, aia kahi mea i mua pono o ke alo, ʻaʻole naʻe i ʻike pono ʻia.
Ke Aolama 