Aloha nō ka hala ʻana o kahi Hawaiʻi Alakaʻi.
ʻO ia aʻela kekahi poʻo nūhou o kēia lā, ka lā 25 o Mei, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua hala aku nei kahi Hawaiʻi Alakaʻi i ke ala hoʻi ʻole mai i ka ʻauinalā Pōʻakahi nei. Ua moe ʻo Colette Yvette Piʻipiʻi Machado i ka moe kapu o Niolopua ma ka Halemaʻi Mōʻīwahine ma hope o kona ʻāʻumeʻume ʻana me ka maʻi no kahi wā lōʻihi. Nui kāna mau hana no ka pono o ka lehulehu a pēlā pū nō hoʻi me ka pono o ka Lāhui Hawaiʻi. He kahu waiwai ʻo Machado no ke Keʻena Kuleana Hawaiʻi no nā makahiki he 24. A ʻo ia ka luna hoʻomalu o ia papa mai ka makahiki 2010 a i ka makahiki 2014, a mai ka makahiki 2017 a i ka makahiki 2020. A he nui hou aku kāna mau hana. ʻO kekahi, ʻo ia kona koi ʻana iā Kenekoa Daniel Inouye a me ke Kiaʻāina John Waiheʻe i ke kōkua ma ka hoʻololi ʻana i nā kānāwai mālama wahi pana e ʻākeʻakeʻa ana i ka hoʻihoʻi hou ʻana i nā loko iʻa a ke kūlana mua. Ua piha nā makahiki he 71 iā Machado. A haʻalele mai nei ʻo ia i kāna kāne, iā Myron Akutagawa ma hope nei.
Ua make aku nei he 19 mau keiki a he ʻelua mau kumu kula aupuni i ke kī pū ʻia ma ke Kula Haʻahaʻa ʻo Robb ma Tekeka. Ua komo wale aku kekahi kanaka i loko o ka lumi papa a kī aku nei i ka puka a paʻa. A ʻo ia kona wā i hoʻomaka ai i ke kī ʻana i nā keiki a me nā kumu. ʻO ka inoa o ua kanaka lā, ʻo Salvador Ramos. Ma hope mai, komo akula na mākaʻi i loko o ka lumi papa a kī akula iā Ramos a make. ʻAʻole i maopopo ke kumu o ia hana mānaʻonaʻo a Ramos.
Eia mai kā kākou ʻōlelo noʻeau,
Anu koʻū ka hale, ua hala ka makamaka.
Mehameha ihola ka hale i ka hala ʻana o ka makamaka nona ka leo heahea.
Ke Aolama 