Ua nalo paha ka maʻi puʻu keko ma Hawaiʻi nei.
ʻO ia aʻela kekahi poʻo nūhou o kēia lā, ka lā 4 o Nowemapa, he Pōʻalima. Welina e nā makamaka. ʻO Ke Aolama kēia a penei ka nūhou.
ʻAʻohe kanaka i lilo ai ka puʻu kālā manuʻa o ka Powerball i ka Pōʻakolu nei. ʻO ke kālā i ia manawa, he $1.2 biliona. A i kēia manawa, ʻo ka nui o ke kālā o ua puʻu lā, he $1.5 biliona. I ka Pōʻaono e huki hou ʻia ai nā helu.
ʻAʻohe kanaka i loaʻa i ka maʻi puʻu keko ma Hawaiʻi nei ma ka mahina ʻo ʻOkakopa. ʻO ka nui o nā kānaka i loaʻa i ua maʻi lā ma kēia pae ʻāina nei, he 39. He 27 o lākou, aia ma Honolulu, he ʻehā ma ka mokupuni ʻo Hawaiʻi, he ʻekolu ma Kauaʻi, a he ʻelua ma Maui.
Aia nō ka honua e nāueue ana a pehu ana nō hoʻi ma Mauna Loa. E hōʻike ana, he luaʻi mai paha koe. Ua ʻōlelo mai nā kānaka akeakamai, ʻaʻole paha e luaʻi ma kēia hope koke aku, akā, ke aʻoaʻo aʻela nā luna aupuni o ka mokupuni ʻo Hawaiʻi, e hoʻomākaukau nā kānaka i ʻole e pilikia ke luaʻi koke. He lua pele ʻā ʻo Mauna Loa, ʻo ia ka lua pele nui loa o Hawaiʻi Moku. Aia nō ia ma ka ʻaoʻao ʻākau o ka lua pele ʻo Kīlauea. ʻO ka manawa hope loa o Mauna Loa i luaʻi ai, ʻo ia ka makahiki 1984. A mai ka makahiki 1843, he 33 ona manawa i luaʻi ai. ʻOkoʻa ka luaʻi ʻana o ka pele o Mauna Loa, a ʻokoʻa ko Kīlauea no ka mea, ʻoi aku ke kiʻekiʻe o Mauna Loa. No laila, e ʻoi aku ka wikiwiki o ke kahe ʻana. A ma muli o ka nui loa o Mauna Loa, ʻoi aku paha ka nui o ka pele maka, ʻo ia hoʻi ka pele o lalo o ka ʻili o ka honua. A no laila, e nui nō ka pele e kahe ana.
Eia mai kā kākou ʻōlelo noʻeau,
Hoʻolaʻi maka ma waho, ʻoʻoleʻa loko.
He ʻōlelo kēia no ke kanaka kāmaʻe.
Ke Aolama 