Hoʻohanohano ʻia ana kekahi mau paniolo o Hawaiʻi nei.
ʻO ia aʻela kekahi poʻo nūhou o kēia lā, ka lā 7 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
E kau ana he ʻeiwa mau paniolo ma ka hano hāweo. ʻO lākou ana kekahi ma ka Holo Paniolo Kaulana o Hawaiʻi nei. ʻElima o lākou, ua moe i ka moe kapu o Niolopua. Eia mai ia mau paniolo ʻeiwa, no ka mokupuni ʻo Hawaiʻi ʻo Theodore Akeni Sonny Akau ʻŌpio lāua ʻo David Hogan Kauwe o Kahi Hānai Pipi ʻo Parker, ʻo William Malulani Kaleipaihala Beckley o Kahi Hānai Pipi ʻo Little Mekiko, a me James William “Kimo” Hoopai ʻŌpio o nā Wahi Hānai Pipi ʻo Kahua, ʻo Parker, ʻo Kehena, ʻo Palani a me KL Cross; no ka mokupuni ʻo Molokaʻi, ʻo Clifford Kuhoupio Dudoit o Puʻu O Hōkū, Kahi Hānai Pipi ʻo Molokaʻi a me Kapualei, ʻo Morrency Duke Kealiikanakaole “Porky” Dudoit o Kahi Hānai Pipi ʻo Molokaʻi; no ka mokupuni ʻo Maui, ʻo James Hapakuka Makua o Kahi Hānai Pipi ʻo ʻUlupalakua, ʻo John M.P. “Jackie” Tavares o Wailanui Farm a me Kahi Hānai Pipi ʻo Huelo, a me Robert Gordon “Boy” von Tempsky o nā Wahi Hānai Pipi ʻo Erewhon, ʻUlupalakua a me Kaupō.
Maikaʻi wale ka hana a Tua Tagovailoa i ka Lāpule nei. He 302 āna ʻīā i nou ai a he ʻekolu āna ʻai holo i nou ai. Lanakila aku nei ʻo Miami ma luna o Kikako ma ka helu ʻai he 35 i ke 32. ʻEleu nō hoʻi ka ʻalihikūlele o Kikako, ʻo Justin Fields. He 123 ʻīā a Fields i nou ai, a he ʻelua āna ʻai holo i nou ai. A he 178 ʻīā a Fields i holo ai. Ma ka moʻolelo o ke Kuʻikahi Pōpōpeku Aupuni, ʻo ia nā ʻīā nui loa a ka ʻalihikūlele i holo ai ma ka hoʻokūkū kūmau o ke kikina.
Eia mai kā kākou ʻōlelo noʻeau,
Hāʻale i ka wai a ka manu.
He ʻōlelo kēia no ke kanaka uʻi.
Ke Aolama 