Hiki nō i ke Keʻena Mākaʻi o Honolulu ke hāʻawi aku i ka laikini paʻa hūnā i ka pū ma ke kino.
ʻO ia aʻela kekahi poʻo nūhou o kēia lā, ka lā 23 o Nowemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
E hoʻomaka ke Keʻena Mākaʻi o Honolulu i ka lawelawe ʻana i nā palapala noi i ka paʻa hūnā i ka pū ma ke kino. I kēia manawa, ʻaneʻane 600 mau palapala noi. I kēia mahina nei, ua paʻa iho nei nā mea i hoʻololi ʻia aku o ka Mokuna 15 o nā Kānāwai o ka Luna Mākaʻi. A ʻo ia ka mea e hiki ai i ke Keʻena Mākaʻi ke lawelawe i ka palapala noi a me ka hāʻawi aku i ka laikini. A i kēia manawa, aia ka Pila 57 ma ka ʻAha Kūkā o Honolulu. He pila ia e hōʻike ana i nā wahi e pāpā ʻia ai ka pū. ʻO Maui ke kalana mua i hoʻomaka i ka hāʻawi ʻana i ka palapala ʻae. Ma ʻAukake i hoʻomaka ai. A ʻo Hawaiʻi a me Kauaʻi, i kēia mahina nei nō i hoʻomaka ai.
Paʻi wikiō aku nei kekahi kanaka i kona mimi wale ʻana aku ma Mauna Kea. A laila, kau aku nei ʻo ia i ia wikiō ma ka Instagram. A piʻi loa aʻela ke kai o nā kānaka he nui ma muli o kāna hana. A no ka nui loa o nā kānaka e ʻōlelo hōʻino ana iā ia, mihi aʻela ʻo ia. E noi haʻahaʻa ana i ke kala ʻia me ka ʻōlelo ʻana, ʻaʻole ʻo ia e hana hou a e aʻo aku ana ʻo ia i ka hewa o ia ʻano hana, i ʻole e hana ʻia aku e nā hanauna ma kēia hope aku.
He māhele hou ko ka pūʻalikoa o ʻAmelika Hui Pū ʻIa. ʻO ka Māhele Kaua Lewa Luna Lilo ia.
A ma Hawaiʻi nei kona kahua mua. A kapa ʻia ihola, ʻo ka Pūʻali Kaua Lewa Luna Lilo ʻAmelika Hui Pū ʻIa o ʻInidonesia me ka Pākīpika. A ʻo ka Berigadia Kenelala Anthony Mastalir ka luna o ia kahua. A ʻo ka nui o nā koa o ia wahi i kēia manawa, he 100 a emi iho. Na ia kahua e kākoʻo i nā māhele ʻē aʻe o ka pūʻalikoa i mea e mākaukau ai nā kahua ma ka lewa luna lilo ke makemake ʻia.
Eia mai kā kākou ʻōlelo noʻeau,
Pua ka lehua.
ʻŌlelo ʻia kēia e ko Kawaihae, ke ʻike aku i ke aku kū.
Ke Aolama 