He puʻu ʻōpala nui kai ʻohiʻohi ʻia mai ke kai mai.
ʻO ia aʻela kekahi poʻo nūhou o kēia lā, ka lā 21 o Nowemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua emi loa ka mea ʻai o nā panakō mea ʻai o Hawaiʻi nei. Māhuahua aʻela nā ʻohana i nele i ka mea ʻai ʻole ma muli o ke emi o ka waiwai o ke kālā. Nui ka mahalo o ka panakō mea ʻai i ka hale ʻaina ʻo Murphy’s Bar and Grill no kāna alu hōʻiliʻili mea ʻai i mālama aku nei. He 36 pelehū i loaʻa mai, a hāʻawi manawaleʻa ʻia he $4,000 a ʻoi e ke kaiāulu. I kēia manawa, ʻaʻole lawa ka mea ʻai a nā kānaka he 250,000 a emi iki mai o Hawaiʻi nei, a he hoʻokahi hapahā o nā keiki a pau o Hawaiʻi nei, ua makapehu i ka hapanui o ka manawa.
ʻOhiʻohi ʻia aku nei he 105,655 paona ʻōpala o ke kai, ʻo ia hoʻi, he 53 kona. He 64,000 paona o ia puʻu nui, he mau ʻupena e waiho wale ana ma ke kohola, a he 32,530 paona ʻupena e waiho wale ana ma ka ʻaekai. A ʻo ke koena, he ʻea e lana wale ana ma ke kai a i paʻa paha ma ka ʻākoʻakoʻa. Ma Papahānaumokuākea ka ʻohiʻohi ʻana.
Kāʻili aku nei ʻo Hawaiʻi i ka lanakila ma ka pāʻani pōpō peku i ka pō Pōʻaono nei. Lanakila aku nei nā Koa Ānuenue o Mānoa ma luna o Nevada-Las Vegas ma ka helu ʻai he 31 i ka 25. A ʻo ia ka hoʻokūkū hope loa e mālama ʻia ma ke Kahua Pāʻani ʻo Ching i kēia kau nei. I kēia Pōʻaono, e hele aku ana ʻo Hawaiʻi i San Jose no ke kūʻē ʻana aku iā San Jose Mokuʻāina, ka hoʻokūkū hope loa o Hawaiʻi o ke kau.
Eia mai kā kākou ʻōlelo noʻeau,
Waiho akāka ke kula o Kaiolohia.
He ʻōlelo kēia no kekahi mea ahuwale.
Ke Aolama 