11-14-17

Aloha nō nā limahana o ka hui mokulele ʻo Island Air.

ʻO ia aʻela kekahi poʻo nūhou o kēia lā, ka lā 14 o Nowemapa, he Pōʻalua. Welina e nā makamaka. ʻO Ke Aolama kēia a penei ka nūhou.

Aloha nō. I ka Pōʻalima nei, ua pau loa ihola ka lawelawe ʻana o ka hui mokulele ʻo Island Air i ka hana. He 37 makahiki o ua hui mokulele nei akā, i kēlā me kēia hapahā makahiki o nā makahiki ʻehā me ka hapa i kaʻa hope aku nei, ua ʻoi aku ka lilo ma mua o ka loaʻa. ʻO ke ʻano o ka panakalupa i noi mua ʻia, ʻo ia ke kūkulu hou Mokuna 11. Akā, i ka Lāpule nei, waiho aku nei ʻo Ted Pettit, he loio no Island Air, i noi i mua o ka ʻAha Hoʻokolokolo Panakalupa i ka hoʻololi ʻia ʻana o ka hihia i Mokuna 7, ʻo ia hoʻi ke kūʻai ʻana aku i ka waiwai lewa a loaʻa ke kālā e uku ai i nā mea hoʻolako ʻaiʻē. ʻO ka mea minamina, he 423 mau limahana o Island Air, a ʻaʻole maopopo ko lākou uku ʻia ʻana a me ka ʻole paha no nā lā hope loa he 10 a lākou o ka hana ʻana. E mālama ana ka hui mokulele ʻo Hawaiian i nā fea ʻoihana i kēia pule nei no nā limahana o Island Air. Ma Līhuʻe, aia i ka hola 8:20 o ke kakahiaka Pōʻakolu a pau i ka hola 12:00 o ke awakea ma ka Lumi ʻAha Kūkā Mezzanine o ke Kahua Mokulele o Līhuʻe. Ma Kahului, aia i ka hola 8:20 o ke kakahiaka Pōʻahā a pau i ka hola 2:40 o ka ʻauinalā ma ke keʻena Island Air o ke Kahua Hoʻolulu Mokulele o Maui. Ma Kona, aia i ka hola 8:20 o ke kakahiaka Pōʻalima a pau i ka hola 12:40 o ke awakea ma ke keʻena Hui Mokulele ʻo Hawaiian o ke Kahua Hoʻolulu Mokulele o Kona. A ma Honolulu, aia i ka hola 9:00 o ke kakahiaka Pōʻaono a pau i ka hola 1:00 ma ke kikowaena Hui Mokulele ʻo Hawaiian ma 3375 Koapaka ma ka papahele ʻeono.

I kēia mahina aʻe, e hoʻomaka ka lele ʻana o ka hui mokulele ʻo Scoot. A e lele kona mau mokulele mai Honolulu a i Osaka i ka Pōʻakahi, ka Pōʻalua, ka Pōʻalima a me ka Pōʻaono, a mai Honolulu i Osaka a i Sinapoa ma ka Pōʻalua, ka Pōʻakolu, ka Pōʻaono a me ka Lāpule. A he kumu kūʻai kūikawā emi loa ke lele aku mai ka lā 19 o Kēkēmapa a i ka lā 25. He $80 wale nō o ka lele ʻana aku mai Honolulu a i Osaka. A he $200 o ka lele loa ʻana aku i Sinapoa. A mai ka lā mua o Ianuali a i ka lā 31 o Mei, he $150 o ka lele ʻana aku i Osaka. A he $250 o ka lele loa ʻana aku i Sinapoa.

Eia mai kā kākou ʻōlelo noʻeau,

He pili wehena ʻole.

ʻO ia hoʻi, he pili koko.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s