Lanakila ka hui Mālama Mākua.
ʻO ia aʻela kekahi poʻo nūhou o kēia lā, ka lā 7 o ʻAukake, he Pōʻalua. Welina e nā makamaka. ʻO Ke Aolama kēia a penei ka nūhou.
ʻAe hou ʻia ka hele ʻana o ka hui Mālama Mākua i Mākua no ka hana ʻana i nā hana kahiko mai nā kūpuna mai. Ma mua, ua hiki nō i ka poʻe hana i nā hana o ke au kahiko ke hele aku i kekahi mau wahi o Mākua, akā, i ka mahina ʻo Iune o ka makahiki 2014, ua hōʻole ihola ka Pūʻalikoa i ke komo o ke kanaka me ka ʻōlelo ʻana, ua pono ke hoʻokō ka Pūʻalikoa i ka hana e pono ai ke Kānāwai Mālama Wahi Pana Aupuni i mea e palekana ai ke ola o ke kanaka ke hele aku i laila. A aia a hoʻokō ʻia a laila e ʻoki ʻia ka mauʻu ma nā ala i nā wahi i ʻae ʻia. Ma ka lā 6 o ʻApelila, e ʻoki mauʻu ana ʻelua mau kānaka ma Mākua no ka hoʻomaʻamaʻa pūʻalikoa. A i ko lāua wā e ʻoki ana i ka mauʻu, pahū aʻela kekahi pōkā e waiho wale ana a ʻeha ihola lāua ʻelua.
He 9,000 ʻeka ʻāina a emi iki mai i pau i ke ahi ma Mākaha a me Waiʻanae. Ua pau i ke kinai ʻia kahi hapa nui, ʻaʻole naʻe e ʻōlelo ana ke ahi, ua ana ia. ʻAʻole ʻo nā kānaka kinai ahi wale nō o Honolulu ke paʻu ana i ka hana, alu like ana ke Keʻena Kinai Ahi Pekelala, ke Keʻena ʻĀina a Waiwai Pili ʻĀina a pēia pū me ke Kiaʻi Aupuni Pūʻalikoa.
Eia mai kā kākou ʻōlelo noʻeau,
Papapau kākou, he ʻaʻā ko ka hale.
ʻO ia ka mea e ʻike ʻia nei ma ka mokupuni ʻo Hawaiʻi ma muli o ka pele e kahe aʻela.
Ke Aolama 