He ahi hou kai hōlapu ma Kapolei.
ʻO ia aʻela kekahi poʻo nūhou o kēia lā, ka lā 8 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.
Aia nō nā kānaka kinai ahi o Honolulu ke noke akula i ka hakakā me ke ahi ma Mākaha a me Waiʻanae i ka lā i nehinei. Ma Mākaha, hoʻomalu ʻia he 80 pākeneka o ke ahi, a ma Waiʻanae, pau i ka hoʻomalu ʻia he 90 pākeneka o ke ahi.
A ma Kapolei, ma kahi o ke Kikowaena Kūʻai ʻo Ka Makana Aliʻi, ʻā ʻia aʻela ke ahi a hōlapu aʻela. Ua pau he ʻeiwa ʻeka ʻāina i ke ahi. Ua pani ʻia ua kikowaena kūʻai lā i ka hola 4:20 o ka ʻauinalā a hoʻohaʻalele ʻia aku nā kānaka ma muli o ka uahi. ʻO ka mea maikaʻi, ua kaʻa aku ke ahi ma lalo o ka hoʻomalu ʻana o nā kānaka kinai ahi i ka hola 8:25 o ke ahiahi.
Ua emi ihola ka ikaika o ka makani pāhili ʻo Hector. He ikaika nō naʻe, he makani pāhili māhele 3, ʻo ia hoʻi, ʻo ka ikaika ʻoi loa o ka makani, he 125 mile o ka hola. ʻO ke kikowaena o ia makani pāhili, e kāʻalo ana he 150 mile ma ka ʻaoʻao hema o ka mokupuni ʻo Hawaiʻi i kēia lā. Ua kūkala ʻia aʻela ma laila, e pāhola paha ka ʻino kalopikala, a ʻo ka ikaika loa o ka makani, he 39 mile a ʻoi o ka hola. A e nui nā nalu ma nā kahakai hikina o ka moku o Keawe a me Maui a Kama.
Eia mai kā kākou ʻōlelo noʻeau,
Pūhā hewa ka honu i ka lā makani.
He ʻōlelo kēia no ke kanaka i hoʻopuka i kahi ʻōlelo kūpono ʻole i ka manawa kūpono ʻole, a ʻo kona pilikia ihola nō ia.
Ke Aolama 