Hōʻike aʻela nā kumu kula aupuni o Hawaiʻi, ʻo Doug Chin kā lākou moho e kākoʻo ai.
ʻO ia aʻela kekahi poʻo nūhou o kēia lā, ka lā 9 o ʻAukake, he Pōʻahā. Welina e nā makamaka. ʻO Ke Aolama kēia a penei ka nūhou.
Hōʻike aʻela ka ʻAhahuina Howard Hughes, ka mea kūkulu iā Ward Village, i ka nui o nā kānaka kūʻai i pūlima i ka palapala ʻaelike no ke kūʻai ʻana mai i nā keʻena noho o ka hale ʻo ʻAʻaliʻi. He 751 mau keʻena noho, a he 500 mau palapala ʻaelike i pau i ka pūlima ʻia. ʻO ka hapanui o nā keʻena noho ma ʻAʻaliʻi, he liʻiliʻi mai kahi noho. ʻO ke keʻena noho ʻuʻuku, he 277 wale nō ona kapuaʻi kuea, a ʻo ke kumu kūʻai, he $500,000. ʻO nā keʻena noho o nā hale mua ʻekolu o Ward Village, ua ʻoi aku ka nui i ko ʻAʻaliʻi, a ʻo ke kumu kūʻai, mai ka hoʻokahi miliona kālā a ka 3.6 miliona kālā. He manaʻo ko ka mea kūkulu e hoʻomaka ke kūkulu ʻana iā ʻAʻaliʻi i kēia makahiki nei. A he manaʻo nō hoʻi kona e kūkulu i hale hou e like loa me ʻAʻaliʻi.
Ua holo ihola ka manaʻo o ka ʻAhahui Kumu Kula Aupuni o Hawaiʻi e kākoʻo i ka Hope Kiaʻāina Doug Chin ma kona alualu ʻana i ke kūlana luna makaʻāinana ma ka ʻĀpana ʻAhaʻōlelo Lāhui ʻEkahi. Wahi a ka pelekikena o ka ʻAhahui Kumu Kula Aupuni o Hawaiʻi, ʻo Corey Rosenlee, he manaʻo ko Chin e hoʻonui i ke kālā o ka waihona hoʻonaʻauao, a e hoʻonui nō hoʻi i ka uku o nā kumu kula, a e hoʻēmi i ka nui o nā haumāna ma ka papa. ʻO nā moho ʻē aʻe e alualu ana i ia kūlana like, ʻo ia ka Lunamakaʻāinana mokuʻāina Kaniela Ing, ka Lunamakaʻāinana mokuʻāina Beth Fukumoto, a me ke Kenekoa mokuʻāina Donna Mercado Kim.
Eia mai kā kākou ʻōlelo noʻeau,
Kuāua nui hoʻi kēlā e hele mai nei.
Hoʻopuka ʻia kēia ʻōlelo i ka wā e ʻike aku ai i nā kānaka he nui i ka hele mai.
Ke Aolama 