Pau iho nei ke koho wae moho.
ʻO ia aʻela kekahi poʻo nūhou o kēia lā, ka lā 13 o ʻAukake, he Pōʻakahi. Welina e nā makamaka. ʻO Ke Aolama kēia a penei ka nūhou.
Ma ke alualu ʻana i ke kūlana kiaʻāina o ka ʻaoʻao Kemokalaka, lilo aku nei ka hapanui o nā pāloka i ke Kiaʻāina David Ige, he 124,528 pāloka, he 51.37 pākeneka. A ʻo Coleen Hanabusa ka mea i kokoke loa, he 107,583 pāloka, he 44.38 pākeneka. A ma ka ʻaoʻao Lepupalika, ʻo Andria Tupola ka lanakila, a he 17,282 pāloka i lilo iā ia, he 55.51 pākeneka. A ʻo John Carroll ka moho ma hope mai, he 10,969 wale nō pāloka, he 35.23 pākeneka. A no laila, ʻo Ige lāua ʻo Tupola nā moho i koe no ke kūlana kiaʻāina. A ma ka ʻaoʻao ʻŌmaʻomaʻo, ʻo Jim Brewer wale nō ka moho hoʻokahi, a no laila, ʻo ia kai lanakila, he 454 mau pāloka. A ma ka ʻaoʻao Kūʻokoʻa (N), ʻo Terrence Teruya kai lanakila, he 542 pāloka.
A ʻo nā moho i koe no ke kūlana hope kiaʻāina, ma ka ʻaoʻao Kemokalaka, ʻo Josh Green kai lanakila, he 74,819 mau pāloka. A ʻo Jill Tokuda, aia nō ma hope pono, he 68,107 pāloka. A ma ka ʻaoʻao Lepupalika, ʻo Marissa Dipasupil Kerns kai lanakila, he 9,749 pāloka. Ma ka ʻaoʻao ʻŌmaʻomaʻo, ʻo Renee Ing wale nō ka moho, he 444 pāloka. A ma ka ʻaoʻao Kūʻokoʻa, ʻo Paul Robotti kai lanakila, he 535 mau pāloka.
Eia mai kā kākou ʻōlelo noʻeau,
Paʻa ka waʻa i Kaʻena.
ʻO ia hoʻi, ua piha inaina kekahi.
Ke Aolama 