He mau mākaʻi paʻi wikiō ko Honolulu nei.
ʻO ia aʻela kekahi poʻo nūhou o kēia lā, ka lā 14 o ʻAukake, he Pōʻalua. Welina e nā makamaka. ʻO Ke Aolama kēia a penei ka nūhou.
ʻAkahi nō a hoʻomaka ka Hui Mokulele ʻo Hawaiian i hana e pono ai ka poʻe makemake e halihali ʻia nā ukana ma kēia pae ʻāina nei. He mau mokulele lele piliʻāina hou ko ia hui mokulele, a ʻo ka ukana wale nō ke halihali ʻia aʻe ma ʻō a ma ʻaneʻi o kēia pae ʻāina nei. I ka lā mua o ʻAukake i hoʻomaka ai ʻo Hawaiian i ka lawelawe ʻana i ia hana. I kēia manawa, he lele ia mau mokulele mai Honolulu a i Līhuʻe a hoʻi, a mai Honolulu a i Hilo a hoʻi. A i ka wā e loaʻa ai ʻelua mokulele halihali ukana hou i kēia makahiki aʻe, e hoʻomaka ka lele ʻana i Kahului a me Kona.
ʻO ka mīkini paʻi wikiō kekahi mea e kau ana ma ka poʻe mākaʻi o Honolulu nei. I ka Pōʻakahi nei, hoʻomaka iho nei ke kau ʻana o ka mīkini paʻi wikiō ma kekahi mau mākaʻi he 30 o ke Keʻena Mākaʻi o Honolulu. ʻO ia mīkini paʻi wikiō, he paʻi wikiō mau i nā kekona he 30 me ke kāpae o nā kekona he 30 i paʻi ʻē ʻia. A ke kaomi ka mākaʻi i ke pihi he ʻelua manawa, mālama ʻia nā kekona he 30 i paʻi ʻē ʻia a e hoʻomau ʻia ke paʻi wikiō ʻana a hoʻopio ʻia ka mīkini. A he manaʻo ko ke Keʻena Mākaʻi o Honolulu, e kau ka mīkini paʻi wikiō ma nā mākaʻi he 1,200 i loko o nā makahiki ʻelua e hiki mai ana.
Eia mai kā kākou ʻōlelo noʻeau,
Moʻa aʻela nō kā ka ʻalae huapī.
He ʻōlelo kēia no kahi kanaka pī nāna e hana no kona pono iho, ʻo ia wale nō.
Ke Aolama 