08-15-18

He hālāwai hōʻeuʻeu no ke kūʻē ʻana i kahi hui kūʻai poke.

ʻO ia aʻela kekahi poʻo nūhou o kēia lā, ka lā 15 o ʻAukake, he Pōʻakolu. Welina e nā makamaka. ʻO Ke Aolama kēia a penei ka nūhou.

ʻĀkoakoa iho nei nā kānaka he 200 a emi mai ma ka Pāka Kia Hoʻomanaʻo ʻo Millennium ma Kikako a kaʻi like akula a i mua pono o kekahi o nā hale ʻaina ʻo Aloha Poke no ka hōʻike ʻana i ko lākou kūʻē ʻana i ka hana a ka hui nona ia hale ʻaina. Ua hoʻokuleana ʻia aku ia hui e hoʻohana ai i nā hua ʻōlelo ʻo aloha me poke, a no laila, ua koikoi akula ia hui i nā hale ʻaina ʻē aʻe a hale kūʻai paha nona ia inoa hoʻokahi nō, ʻo “Aloha Poke,” e ʻoki ʻia aku ia inoa. A ʻo ia ke kumu i ala aʻe nei nā kānaka me ke kūʻēʻē ʻana i ka Hui ʻo Aloha Poke.

He hoʻokūkū hou kahi e ʻimi ai i mea e pau ai ka maʻi ʻino e make loa nei ke kumu ʻōhiʻa lehua, ʻo ia maʻi ʻino, ʻo ia ka Rapid ʻŌhiʻa Death. ʻO ka makana o ia hoʻokūkū, he $75,000. A ʻo ka makana nui loa paha, ʻo ia ke ola ʻana o ka ʻōhiʻa lehua. Na ke Keʻena o ke Kuhina Kālaiʻāina e mālama nei i ka hoʻokūkū ma ka hana pū ʻana me Conservation X Labs. A he kono ia i nā kaiāulu akeakamai, puni waiwai hoʻopuka, a ʻenehana, e waiho mai i manao no ka hana e pau ai ka Rapid ʻŌhiʻa Death. Paipai ʻia ka poʻe e komo ana i loko o ia hoʻokūkū, e haku i wahi e ʻike koke ʻia ai nā kumu ʻōhiʻa lehua i loaʻa i ia maʻi a i wahi paha e emi ai ka laha ʻana o ke kalina ʻino e maʻi ai ke kumu, a i wahi e pale ai i ka loaʻa ʻana o ke kumu ʻōhiʻa lehua i ia maʻi. A ʻo ka pahuhopu nui loa, ʻo ia ka hana ʻana i mea e ola ai nā kumu i loaʻa i ia maʻi a i mea nō hoʻi e hoʻopau loa ai i nā mea hoʻomaʻi o ka Rapid ʻŌhiʻa Death.

Eia mai kā kākou ʻōlelo noʻeau,

Pōhaku kaomi moena.

He ʻōlelo kēia no ke kanaka kiʻinoho, ʻo ia hoʻi, he mea maʻa mau ka noho ʻana ma ka hale, ʻaʻole e puka i waho.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s