He paio kālaimanaʻo kahi e hui pū ai ka moho Kemokalaka a me ka moho Lepupalika e alualu ana i ke kūlana kiaʻāina.
ʻO ia aʻela kekahi poʻo nūhou o kēia lā, ka lā 24 o Kepakemapa, he Pōʻakahi. Welina e nā makamaka. ʻO Ke Aolama kēia a penei ka nūhou.
E mālama ʻia ana kekahi paio kālaimanaʻo, kahi e hui pū ai ke Kiaʻāina David Ige a me ka Luna Makaʻāinana Andria Tupola no ka hoʻopāpā ʻana. ʻO ka lā e mālama ʻia ana, ʻo ia ka lā 29 o ʻOkakopa, ma ka hola 9:00 o ke ahiahi. A e hoʻolele ʻia ana ma luna o ke kīwī, ma KITV ma ia hola hoʻokahi nō. ʻO kahi pilikia, e pau paha nā pāloka leka i ka hoʻouna ʻia ke hiki aku i ka lā 29 o ʻOkakopa. He manaʻo ko Tupola, e mālama ʻia he ʻeono mau paio kālaimanaʻo.
ʻO nā wāhine o ka hui hoe waʻa ʻo Team Bradley ka ʻoi. Mālama ʻia iho nei ka heihei waʻa ʻo Nā Wāhine O Ke Kai i ka Lāpule nei, a ʻo Team Bradley ka mua i hiki mai i ka pahu hope. A ʻo nā wāhine o ia hui, ʻo ia ʻo Cherisse Agorastos, ʻo Andrea Moller-Bouwens, ʻo Kristin Foster, ʻo Lori Nakamura, ʻo Kaulu Luʻuwai, ʻo Mahealani Botelho, ʻo Alana Goo, ʻo Nicole Pederson, ʻo Kealani Bartlett a me Claire Ing. ʻO ko lākou manawa, he ʻelima hola, he 48 minuke a me nā kekona he 28. A ʻo ke kolu kēia o ka makahiki i lilo ai ka inoa moho i nā wāhine o Team Bradley ma nā makahiki ʻekolu i kaʻa hope iho nei. ʻO Outrigger Canoe Club ka helu ʻelua, a ʻo Team Maui Jim ka helu ʻekolu. A ʻo Lanikai ka helu ʻehā. He 64 mau hui i komo i loko o ia heihei.
Ua lanakila aku nei nō ʻo Hawaiʻi ma luna o Duquesne ma ke Kahua Pāʻani ʻo Aloha i ka Pōʻaono nei ma ka helu ʻai he 42 i ka 21. Eia naʻe, e hopohopo ana ko Hawaiʻi ma ka hapahā mua, ʻoiai, ua lilo nā ʻai mua he 14 o ia hoʻokūkū iā Duquesne. Akā, hiu aʻela nā Koa Ānuenue, a lei ana i ka lei o ka lanakila. He 273 ʻīā a Cole McDonald i nou ai a he ʻelima āna ʻai holo i nou ai.
Eia mai kā kākou ʻōlelo noʻeau,
E! Loaʻa akula ke kalo, ʻo ka ʻapowale.
ʻO ia hoʻi, he hoʻopau manawa ka hana.
Ke Aolama 