ʻIke ʻia nā ʻai a nā uʻi o Hawaiʻi ma ka hoʻokūkū pōpō peku kulanui.
ʻO ia aʻela kekahi poʻo nūhou o kēia lā, ka lā 26 o Kepakemapa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ua koho ʻia ka loio nāna ka ninaninau iā Brett Kavanaugh, ka moho luna kānāwai ʻAha Kiʻekiʻe, a me Christine Blasey Ford, ka mea nāna e ʻōlelo nei, ua puʻe ʻo Kavanaugh iā ia i ko lāua wā ʻōpiopio. ʻO ka loio, ʻo ia ʻo Rachel Mitchell. He Lepupalika ʻo Mitchell a hana ʻo ia ma ke Keʻena Loio o ke Kalana ʻo Maricopa ma Phoenix.
He maikaʻi wale ka hana a kekahi mau ʻalihikūlele o Hawaiʻi nei i ka hopena pule nei. ʻO ka mua, ʻo ia nō ʻo McKenzie Milton o Pololika Waena. Mai ke Kula Kiʻekiʻe ʻo Mililani ʻo ia i puka ai, a koho ʻia ʻo ia, ʻo ia ka mea pāʻani kūlele ʻoi loa o ka ʻAhahui ʻĀlapa ʻAmelika o ka pule. A ʻo ka lua ia o ka manawa i lilo ai ia hanohano iā ia ma loko o nā hoʻokūkū ʻekolu i kaʻa hope aku nei. I ka Pōʻalima nei, he 306 āna ʻīā a he ʻekolu āna ʻai holo i nou ai. A he ʻekolu āna ʻai holo i holo ai. A ʻo Tua Tagovailoa kekahi i hōʻike aʻe nei i kona akamai ma ke ʻano he ʻalihikūlele, a he ʻekolu wale nō ona hapahā i pāʻani ai. Ma ke kūʻē ʻana aku o Alabama iā Texas A&M i ka Pōʻaono nei, he 387 āna ʻīā i nou ai. A he ʻehā āna ʻai holo i nou ai, a he hoʻokahi ʻai holo i holo ai. A ʻo Jordan Taʻamu kekahi i hana maikaʻi. Mai ke Kula Kiʻekiʻe ʻo Pearl City ʻo ia i puka mai ai a he ʻalihikūlele no Mikikipi i kēia manawa. He 442 āna ʻīā i nou ai. A he ʻelua āna ʻai holo i nou ai, a hoʻokahi āna ʻai holo i holo ai.
Eia mai kā kākou ʻōlelo noʻeau,
Haʻahaʻa haka, pau i ka ʻīlio.
ʻO ia hoʻi, ʻaʻole e waiho wale nā mea makamae o lilo aku auaneʻi i ka pikopauʻiole.
Ke Aolama 