E pilikia paha ka hui fea ʻo E. K. Fernandez.
ʻO ia aʻela kekahi poʻo nūhou o kēia lā, ka lā 28 o Kepakemapa, he Pōʻalima. Welina e nā makamaka. ʻO Ke Aolama kēia a penei ka nūhou.
ʻAe iho nei ke Kiaʻāina David Ige i kekahi paio kālaimanaʻo me ka Lunamakaʻāinana Andria Tupola. Ma KHON-TV e mālama ʻia ai i ka hola 9:00 o ke ahiahi o ka lā 15 o ʻOkakopa. ʻAʻole naʻe i holo ka manaʻo o Tupola e ʻae a e hōʻole paha i kēia manawa. ʻO kekahi pilikia, ʻaʻole ʻo lāua wale nō ke paio kālaimanaʻo ma ia paio ʻana, ʻo nā hope kiaʻāina nō kekahi. ʻO Marissa Kerns ka moho o ka ʻaoʻao Lepupalika. Akā, he hukihuki ma waena o Tupola me Kerns. Ua paʻa ʻē kekahi paio kālaimanaʻo o Ige me Tupola i ka lā 29 o ʻOkakopa ma KITV.
ʻĀpono aku nei ka Papa ʻOihana Mahiʻai o Hawaiʻi i nā lula i hoʻololi ʻia e pāpā ana, ʻaʻole e hoʻokomo i ka holoholona ʻāhiu e pōʻino ai ke ola o ke kanaka i loko o kēia mokuʻāina nei no nā fea a hōʻikeʻike ʻē aʻe paha. ʻO kekahi pilikia, hoʻomāinoino ʻia aku ia ʻano holoholona. Wahi a Scott Fernandez, ka luna hoʻokō o ka hui E. K. Fernandez, ʻaʻole i hoʻolohe ka Papa ʻOihana Mahiʻai i ka hapanui o nā hōʻike a ka lehulehu i ka Pōʻalua nei. A inā holo loa ia lula, e pau ka pono o kāna hui fea. Ma hope o ka heluhelu ʻia ʻana e ke keʻena o ka Loio Kuhina o Hawaiʻi, e hiki aku ana i mua o ke Kiaʻāina Ige no ka pūlima ʻana. A inā pūlima ʻia e Ige, e hoʻokō ʻia ke kānāwai he 10 lā ma hope aku.
Eia mai kā kākou ʻōlelo noʻeau,
Pūhā ka honu, ua awakea.
Hoʻopuka ʻia kēia i ka wā e hāmama ai ka waha o ke kanaka. Ua pau ka wā hiamoe. Ua hiki mai ka wā hana.
