ʻĀhaʻi hou ʻo Hawaiʻi i ka lanakila ma ka pōpō pekupeku.
ʻO ia aʻela kekahi poʻo nūhou o kēia lā, ka lā mua o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua emi ihola nā koholā i ʻike ʻia ma nā kai o kēia pae ʻāina. A ʻo kekahi pilikia ma nā makahiki ʻekolu i kaʻa hope aku nei, e emi ana nō hoʻi ka lohe ʻia ʻana o ka hīmeni ʻana o ke koholā kāne, a pēlā nō hoʻi ka holo ʻana o ka makuahine me kāna keiki.
Mai make ʻo Hawaiʻi iā Kāna Hokē Mokuʻāina ma ka hoʻokūkū o ka Pōʻaono nei. I ke kani ʻana o ka pū, ua paʻi a paʻi, he 31 ʻai a Kāna Hokē, a he 31 ʻai a Hawaiʻi. A no laila, mālama ʻia ihola ka manawa kaulele. Lilo mua ka pōpō iā Hawaiʻi, a paʻa maila he ʻai holo ma muli o ka holo ʻana o Dayton Furuta he hoʻokahi ʻīā. ʻO ka mea ʻāpiki, ma hope pono iho nō, paʻa ihola kahi ʻai holo iā Kāna Hokē ma ka holo ʻana o Malike Roberson he 13 ʻīā. A he manawa kaulele hou. A ʻo ka ʻoiaʻiʻo, he ʻelima manawa kaulele o ia hoʻokūkū o ka Pōʻaono nei. A i ka hopena, lilo aku nei ke eo iā Hawaiʻi ma ka helu ʻai he 44 i ke 41. ʻO ka ʻai holo a Furuta, ʻo ka mua nō ia āna ma loko o nā kikina ʻekolu āna i pāʻani ai ma ke Kulanui o Hawaiʻi. ʻO kahi mea e pūʻiwa ai ka noʻonoʻo, ʻaʻole i hoʻomaʻamaʻa ʻo Furuta ma nā lā ma mua o ka hoʻokūkū ma muli o ka ʻeha o kona wāwae.
Eia mai kā kākou ʻōlelo noʻeau,
Hana a lau a lau ke aho, a laila loaʻa ka iʻa kāpapa o ka moana.
ʻO ia hoʻi, e hoʻomākaukau a mākaukau pono no kahi papahana nui.
Ke Aolama 