10-03-18

E kau ana kekahi mau kānaka o ka ʻoihana mele i ka hano hāweo.

ʻO ia aʻela kekahi poʻo nūhou o kēia lā, ka lā 3 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

I kēia Lāpule, e lilo ana ka Makana Kū I Ka Niʻo o ke Kula Hoʻopaʻa Mele o Hawaiʻi i kekahi mau kānaka ʻelima o ka ʻoihana mele o Hawaiʻi nei. He ʻehā o lākou, he mau puʻukani. ʻO ka mua, ʻo ia ʻo Willie K. He 16 āna makana Nā Hōkū Hanohano. ʻO Al Harrington ka lua. Ua kaulana loa ʻo ia i kāna hōʻikeʻike ma Waikīkī. ʻO Kimo Alama Keaulana ke kolu. He haku mele nani wale mai ka piha ʻana o nā makahiki he 17 iā ia, a ʻike ʻia kona akamai a mākaukau ma ka ʻōlelo Hawaiʻi a me ka haku mele. ʻO Sam Septimo ka hā. He mea hoʻokani pila ʻo ia ma nā hale inu o ke “kula kahiko”, he haku mele a he mau pāleo kāna i kaulana. ʻO ka lima, ʻo Mike Kelly, ʻaʻole ia he hoʻokani pila, akā, nui kāna hana ma ka ʻoihana mele. He hale kūʻai pāleo kona ma Honolulu ma mua, he kūʻai hoʻolaha lekiō, he luna hoʻohana ʻo ia ma nā hale hoʻolele leo o Hawaiʻi, a he luna hoʻopuka pāleo Nā Hōkū Hanohano. A lilo aku nei ka Makana Hoʻoilina i kekahi mau kānaka ʻelua. ʻO ka mua, ʻo ia ʻo Julita Nani Alapai, he puʻukani kaulana wale a ʻo ia kekahi o nā wāhine mua loa i ʻoki ʻia kona leo i pāleo. E kū ana kāna moʻopuna kuakahi hānai nona, ʻo ia ʻo Thomas K. Lake III. ʻO ka lua, ʻo ia ʻo Martin Pahinui, ka muli loa o nā keiki a Gabby Pahinui. Ua lilo iā ia he ʻehiku Makana Nā Hōkū Hanohano no kāna hana me ka Hui ʻo Peter Moon a he maikaʻi wale kāna hana ma ka ʻoihana mele ma ia hope mai. E kū ana kāna wahine ʻo Ruthie nona.

Ua koho hou ʻia ʻo McKenzie Milton o ke Kulanui o Pololika Waena, ʻo ia ka mea pāʻani kūlele ʻoi o ka ʻAhahui ʻĀlapa ʻAmelika o ka pule i hala iho nei. Lanakila aku nei ʻo Pololika Waena ma luna o Pitabuga i ka Pōʻaono nei ma ka helu ʻai he 45 i ka 14. He 328 ʻīā a Milton i nou ai a he ʻehā ʻai holo. A he 51 āna ʻīā i holo ai, a he ʻelua nō hoʻi ʻai holo. A lilo nō hoʻi ka Makana ʻo Walter Camp iā ia. ʻO ia makana, lilo aku i ka mea pāʻani ʻoi o ʻAmelika. Ua puka ʻo Milton mai ke Kula Kiʻekiʻe o Mililani.

Eia mai kā kākou ʻōlelo noʻeau,

Pāpahi i ka hae o ka lanakila.

He ʻōlelo no ke kanaka i lanakila.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s