10-05-18

ʻĀkoakoa aku nei kānaka no ke kūʻē i ka hana māinoino wahine a ʻohana.

ʻO ia aʻela kekahi poʻo nūhou o kēia lā, ka lā 5 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.

Ua kaʻi like akula nā kānaka he 1,000 a ʻoi mai ke Kapikala a i ka Hale Aliʻi no ka hana māinoino wahine a ʻohana paha. No ka hālāwai hōʻeuʻeu ia o ke Kaʻi Like Kūʻē Hana Māinoino o ke Kāne o ka makahiki 2018. ʻO ka 24 ia o ka makahiki i mālama ʻia ai nei kaʻi like. ʻO ka hana māinoino ia ma ka ʻohana a ma ka pilina aloha paha. A ʻo ka hopena o ia ʻano hana māinoino, he make nō i kekahi manawa. I kēia pule nei, ʻike ʻia iho nei nō. I ka Lāpule nei, ua hou aku nei kekahi wahine i kekahi kāne o Nānākuli a make ihola ke kāne. Wahi a ka wahine, e hana māinoino ana ua kāne lā iā ia. A ma Ālia Paʻakai, hou aku nei kekahi kāne i ka wahine i ka pahi a laila, lele ihola ke kāne mai ka papahele 15 o kekahi hale papaʻi a make ihola. Ua ʻōlelo ka poʻe nāna i hoʻolālā i ke kaʻi like, ma Hawaiʻi nei, he 50,000 mau wāhine a ʻoi aku a emi mai paha, he 18 makahiki a ka makahiki 64, hana māinoino ʻia i kēlā me kēia makahiki. Inā pilikia ʻoe i ka hana māinoino, eia mai kekahi mau helu e kāhea ai i kōkua, Catholic Charities Hawaiʻi, 524-HOPE; Domestic Violence Action Center, 531-3771; Mental Health America of Hawaiʻi, mentalhealthhawaii.org; and Parents and Children Together, 847-3285.

E hoʻi hou mai ana ka Hana Keaka ʻo “Ka Lapu o ke Keaka Mele” i Honolulu i kēia makahiki aʻe. E mālama ʻia ana mai ka lā 7 o ʻAukake a i ka lā mua o Kepakemapa o ka makahiki 2019. Aia ana ma ka Hale ʻAha Mele ʻo Blaisdell. A mai ka lā 23 o ʻOkakopa a i ka lā 27, e mālama ʻia ana ʻo “The Illusionists: Live from Broadway.” A mai ka lā 24 o Kēkēmapa a i ka lā 29, e mālama ʻia ana ʻo “Rent: 20th Anniversary Tour.” E hoʻomaka ke kūʻai ʻia ʻana o ke kikiki kikina i kēia lā no nā hana keaka ʻekolu, mai ka $130 a i ka $310. A inā e kūʻai ana i nā kikiki he 10 a ʻoi o ka hana keaka “Ka Lapu o ke Keaka Mele,” he hiki nō hoʻi ke kūʻai ʻia i kēia manawa.

Eia mai kā kākou ʻōlelo noʻeau,

ʻAi nō i kalo moʻa.

ʻO ia hoʻi, ua pau ka hana. He hiki ke noho a hoʻonanea.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s