Make ihola kekahi i ke kī pū ʻia e ka mākaʻi.
ʻO ia aʻela kekahi poʻo nūhou o kēia lā, ka lā 8 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
Ua kī ʻia aku nei kekahi kanaka i ka pū e ka mākaʻi a make i ke kakahiaka Lāpule nei. Aia nō ua kanaka nei ma hope o ka Hale o ke Keʻena Ola ma uka o ke Kapikala, ua paʻa ʻo ia i ka pahi kā, a hili akula ʻo ia i kekahi mākaʻi, ʻo ka pōmaikaʻi, e komo ana ka mākaʻi i ka pūliki pale pōkā. A ma hope mai, kī akula kekahi mākaʻi i ka pū uila, a ʻo kekahi mākaʻi, kī akula i ka pū he ʻekolu a ʻehā paha manawa, a kū ke kino a me ka lima o ke kanaka i ka pōkā. ʻO ke ono ia o ka manawa i kī ai ka mākaʻi o ke Keʻena Mākaʻi o Honolulu a make ke kanaka i kēia makahiki nei. A ʻo lākou a pau, mai ka mahina mai ʻo Iune.
Ma ka hoʻokūkū pōpō peku o Hawaiʻi, ʻaʻole i pāʻani ʻo Cole McDonald, ka ʻalihikūlele maʻa mau, ma muli o ka ʻeha. Akā, ua lanakila nō nā Koa Ānuenue ma ka helu ʻai he 17 i ka 13. Na Chevan Cordeiro i pani i ka hakahaka ma ke kūlana ʻalihikūlele, a he maikaʻi wale kāna hana. He 148 āna ʻīā i nou ai, a he ʻelua āna ʻai holo i nou ai. A he ʻeleu nō ka ʻaoʻao kūpale o Hawaiʻi.
Eia mai kā kākou ʻōlelo noʻeau,
Ka ulua kāpapa o ke kai loa.
He ʻōlelo kēia no ke koa ikaika.
Ke Aolama 