He ʻolohani ka hana ma nā hōkele Marriott.
ʻO ia aʻela kekahi poʻo nūhou o kēia lā, ka lā 10 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
Ke ʻolohani aʻela nā limahana o nā hōkele Marriott ma Hawaiʻi nei. He 2,700 ka nui o lākou, a ʻakahi nō a hoʻomaka ia hana ma ka Pōʻakahi nei. ʻO ko lākou makemake, e hoʻonui ʻia ka uku a e hoʻomaikaʻi i ka pōmaikaʻi. A he kākoʻo nō kekahi mau uniona iā lākou. ʻO ka poʻe limahana mokulele o ka hui ʻo United Airlines, ua hoʻopau i ko lākou noho ʻana ma ka hōkele ʻo ka Sheraton Princess Kaʻiulani. A ʻo ka United Public Workers, ua huki aku i ko lākou mau lālā mai kekahi ʻaha palekana e mālama ʻia ana ma ka Sheraton Waikīkī. A ʻo ka Uniona Limahana Mekala o Hawaiʻi, ua kāpae i ko lākou noho ʻana ma nā lumi he 100 o ka Sheraton Maui, i hoʻopaʻa ʻia no ka pule hoʻokahi. Hōʻike ka ʻAhahui Kuene Mokulele, he kākoʻo piha nō i ka ʻolohani a nā limahana o nā hōkele Marriott. ʻAʻole e ʻaʻe nā lālā o ka ʻAhahui Kuene Mokulele i ka laina ʻolohani. Ua hoʻomaka ke kūkākūkā ʻana o ka uniona me Marriott i ka mahina ʻo Iune a ʻaʻole i paʻa kahi ʻaelike.
I ke noi ʻana o Laycie Tobosa i laikini kalaiwa hou ma ke Keʻena ʻOkomopila ma Hilo, ua noi ʻia ʻo Tobosa e wehe i kona pale poʻo i mea e paʻi ʻia ai kona kiʻi. Akā, ʻo ia pale poʻo, he mea hoʻomana ia. A wahi a Tobosa, ʻo ke noi ʻana i ka wahine e wehe i kona pale poʻo, he like ia me ke noi ʻana aku iā ia e wehe i kona lole a me kona paleʻaʻahu. No laila, ʻaʻole i ʻae ʻo Tobosa e wehe i kona pale poʻo, a ʻo ka hopena, he laikini kalaiwa kūikawā wale nō kai hāʻawi ʻia iā ia. ʻAʻohe kiʻi o ia ʻano laikini. I ka lā mua o Pepeluali i noi ai ʻo Tobosa i laikini kalaiwa hou a ʻakahi nō a loaʻa mai ka laikini maoli i ka lā mua o Mei. Hōʻike aʻe nei ka Uniona Kūʻokoʻa Kīwila ʻAmelika o Hawaiʻi i ke Keʻena ʻOkomopila o ke kalana ʻo Hawaiʻi, e hoʻololi i ka hana, ʻoiai, he hana kūʻē kumukānāwai ia. A hoʻouna nō hoʻi ia uniona i ka leka i nā Keʻena ʻOkomopila o nā kalana ʻo Honolulu, ʻo Maui a me Kauaʻi me ke noi ʻana i ka hōʻoia, ʻaʻole lākou e hana like nei ma ke kūʻē kumukānāwai.
Eia mai kā kākou ʻōlelo noʻeau,
He hele pīlali ʻāina maoli nō.
ʻO ia hoʻi, poina ihola ka hoʻi ʻana i ka hale ma muli o ka lilo loa ʻana o ka noʻonoʻo i kekahi hana.
Ke Aolama 