Pepehi a pōā ʻia kekahi kanaka ma Kalihi.
ʻO ia aʻela kekahi poʻo nūhou o kēia lā, ka lā 15 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
I ka pō Pōʻaono nei, pepehi aʻela kekahi mau kānaka, he ʻehiku a ʻewalu paha, i kekahi kanaka ma Kalihi. A ma hope o ko lākou pepehi ʻana aʻe i ua kanaka nei, pōā maila lākou iā ia a nāholo akula. ʻO ka hola 10:30 paha ia o ia pō. Ua ʻōlelo ʻia, he mau mea hōʻeha ko ua mau kānaka lā. Ua ʻeha kūkonukonu nō ke kanaka i pepehi ʻia a lawe ʻia akula ʻo ia i ka haukapila. Aia nō ka mākaʻi ke ʻimi akula i ia mau kānaka pōā.
Ua eo ihola ʻo Hawaiʻi iā Berigama Iana ma ka helu ʻai he 49 i ka 23 i ka Pōʻaono nei. ʻO ka ʻumi ia o ka manawa o ia mau hui ʻelua i hoʻokūkū ai ma Mauna Pōhaku, a ʻo ka ʻumi nō hoʻi ia o ka manawa i eo ai nā Koa Ānuenue i nā Koukā. Inā i lanakila ʻo Hawaiʻi, inā ua paʻa mai ka hoʻokūkū ʻana ma ka Ipu Hawaiʻi e mālama ʻia ana ma ka lā 22 o ka mahina ʻo Kēkēmapa. ʻO nā lanakila he ʻehiku, ʻo ia ka mea e paʻa ai ke komo ʻana o nā Koa Ānuenue i loko o ka Ipu Hawaiʻi. A no laila, he paʻa mai paha koe.
Eia mai kā kākou ʻōlelo noʻeau,
Mehameha wale nō ʻo Puʻuloa, i ka hele a Kaʻahupāhau.
Hoʻopuka ʻia kēia ʻōlelo i ka wā e haʻalele ai kahi mea aloha i ka hale.
Ke Aolama 