10-17-18

He hoʻomākaukau ka hana o ke Keʻena Ola o Hawaiʻi no kahi kānāwai hou e kū ana i ka lā mua o Ianuali.

ʻO ia aʻela kekahi poʻo nūhou o kēia lā, ka lā 17 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.

He mau kikiki hou ke kūʻai ʻia ana no ka ʻaha mele o Bruno Mars. He ʻekolu ʻaha mele e mālama ʻia ana ma ke Kahua Pāʻani ʻo Aloha i kēia mahina aʻe, a ua pau koke nā kikiki a pau, he 100,000 a ʻoi, i ke kūʻai ʻia i loko o nā hola ʻelua a ʻoi iki paha. I kēia Pōʻalima ana e hoʻomaka ai ke kūʻai ʻia ʻana o nā kikiki hou no ia mau ʻaha mele ʻekolu o ka lā 8, ka lā 10 a me ka lā 11 o Nowemapa. I ka hola ʻumi ana e hoʻomaka ai ke kūʻai ʻana a ma ka pūnaewele wale nō, ma ka Ticketmaster. A no nā hola mua he 48, ʻo ka poʻe wale nō e noho paʻa ana ma Hawaiʻi nei ke kūʻai. ʻAʻole i hōʻike ʻia ke kumu kūʻai o nā kikiki, akā, ʻo nā kikiki ma mua, ʻo ka mea emi loa, he $49.50.

I ka lā mua o Ianuali o ka makahiki 2019 e kū ai ke kānāwai kahi e ʻae ʻia ana ke kanaka makua i loaʻa i ka maʻi make, e hoʻomake iā ia iho ma ka loaʻa ʻana o kahi kuhikuhi lāʻau e pau ai ke ola. ʻO ka hana a ke Keʻena Ola o Hawaiʻi i kēia manawa, ʻo ia ka hana ʻana i ala e hōʻoia ʻia ai ka ʻike leʻa ʻana o ka maʻi a me kona ʻohana i nā koho ʻē aʻe no ka mālama ʻana i ke kanaka i loaʻa i ka maʻi make. I ka lā mua o ka makahiki, e hiki ana i ke kanaka i maikaʻi kona noʻonoʻo kanaka ke noi i ka lāʻau hoʻomake ma hope o ka hōʻoia ʻana o nā kauka ʻelua, ua loaʻa ʻo ia i ka maʻi make, a he ʻeono wale nō ona mahina e ola ai, akā he pono i ke kanaka maʻi ke ʻai i ka lāʻau me ke kōkua ʻole ʻia. He pono i ia kanaka ke noi he ʻelua manawa, a he 20 lā ma waena o ke noi mua a me ke noi ʻelua. A koi ʻia nō hoʻi ke noi kākau i ʻike maka ʻia e ʻelua mau kānaka, a ʻo kekahi o lāua, ʻaʻole he mea e hoʻopōmaikaʻi ʻia e ka waiwai o ke kanaka maʻi.

Eia mai kā kākou ʻōlelo noʻeau,

Aia nō i ka mea e mele ana.

ʻO ia hoʻi, e noʻonoʻo ke kanaka no kona pono iho.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s