Kau ka hoʻopaʻi o kekahi no ke kī ʻana i mau nēnē a make.
ʻO ia aʻela kekahi poʻo nūhou o kēia lā, ka lā 19 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.
I ke kakahiaka o ka Pōʻakolu nei, pau ihola kekahi hale i ke ahi ma Kaimukī. A pau pū i ka make he makuahine, ʻo Connie Moribe Wharton, a me kāna pēpē, ʻo Sophia. Aia ka hale ma ke Alanui ʻo Luakaha. ʻO Lukānela Nathan Wharton o ke Keʻena Mākaʻi o Honolulu, ʻo ia ke kāne a Moribe Wharton a me ka makuakāne o Sophia. A ua loaʻa he ʻekolu mau pahu pōpene ma ka hale kaʻa, akā, ʻaʻole i hōʻoia ʻia, ʻo ia ke kumu i ʻā ʻia ai ke ahi. Akā, wahi a kekahi hoa noho e noho ana ma kekahi ʻaoʻao o ke alanui, ua lohe ʻo ia i ka pahū nui ʻana. Aia nō ka mākaʻi ke noiʻi akula.
Kau aʻe nei ka hoʻopaʻi o kahi kanaka o Kauaʻi no ke kī ʻana i ʻehā mau nēnē i ka pū pōkā peleka a make ma kahi o kona hale ma Kōloa. ʻO Steven Cookson ka inoa o ua kanaka lā. A ʻo kona hoʻopaʻi, ʻo ka uku he $40,775. I ka lā 8 o Pepeluali o ka makahiki 2017 kona hoʻomake ʻana i ia mau manu. A ua hoʻāʻo ʻo Cookson e hoʻomake aku i kekahi nēnē i kekahi lā aku.
Eia mai kā kākou ʻōlelo noʻeau,
Pihaʻā moe wai uka.
ʻO ia hoʻi, he loea ma ka hana ʻālapa kahi e ʻike ʻia ai ka ikaika o ke kanaka.
Ke Aolama 