Hoʻokuʻi ʻia aku nei kekahi koʻele wāwae a make ihola.
ʻO ia aʻela kekahi poʻo nūhou o kēia lā, ka lā 22 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.
He koʻele wāwae kai make i ka hoʻokuʻi ʻia i ke Alanui ʻo Kuakini ʻĀkau i ke kakahiaka o ka Lāpule nei. He ʻelemakule nō, he 73 ona makahiki. A e hele ana ua ʻelemakule nei ma ke kāʻei koʻele wāwae i kona wā i hoʻokuʻi ʻia ai e ke kalaka. Lawe ʻia akula ʻo ia i ke Kikowaena Lapaʻau ʻo ka Mōʻīwahine ma ke kūlana kūpilikiʻi, a ma laila ʻo ia kahi i make ai. Ma ka hōʻike a ka mākaʻi, ʻaʻole paha ʻo ka holo nui, ka wai ʻona a me ka lāʻau ʻona ke kumu o ka ulia. ʻO ka iwakālua kūmāono ia o ke koʻele wāwae i make i kēia makahiki nei. A ʻo ke kanalima kūmāono ia o ke kanaka i make ma ka ulia kaʻa.
Ma ka helu ʻia ʻana o ka nui o ka waiwai i pohō i ka pele ma ka mokupuni ʻo Hawaiʻi, ʻaneʻane e hiki aku i ka $28 miliona. ʻO ka nui o nā mahiʻai he 46, a hōʻike maila lākou, ʻo ka nui o ka pohō o ka mea kanu, he $17 miliona. ʻO ka nui o ka pohō o ka ʻoihana pua, he $13.3 miliona. A ʻo ka ʻoihana hēʻī, he $6.5 miliona. A ʻo ka ʻoihana hua makekemia, he $2.5 miliona.
Eia mai kā kākou ʻōlelo noʻeau,
Waiho kāhelahela ʻo Kalaupapa.
He ʻōlelo kēia no kekahi mea i ahuwale.
Ke Aolama 