Paʻa ihola kahi ʻaelike ma waena o ke Kula ʻo Kamehameha a me nā kānaka i hoʻopiʻi aku i ia kula.
ʻO ia aʻela kekahi poʻo nūhou o kēia lā, ka lā 24 o ʻOkakopa, he Pōʻakolu. Welina e nā makamaka. ʻO Ke Aolama kēia a penei ka nūhou.
Uku aʻela ke Kula ʻo Kamehameha he $65 miliona i nā kānaka he 32 i hoʻopiʻi akula i ia kula no ko lākou lolo kukui ʻia e kekahi kauka. Mai nā makahiki 1950 a i nā makahiki 1980 lākou i lolo kukui ʻia ai. ʻO ka hapanui o ia mau keiki, he mau haumāna lākou i ia manawa ma ia kula. Ua paʻa ihola kahi ʻaelike, ʻo ia hoʻi, e uku ʻia he $80 miliona i ia mau kānaka. Ua hoʻopiʻi ʻia ke Kula ʻo Kamehameha, ke Kikowaena Lapaʻau ʻo Kāna Palakiko a me ka waiwai hoʻoilina o Kauka Robert Browne, ka mea a nā kānaka hoʻopiʻi i ʻōlelo ai, nāna i lolo kukui iā lākou. Ua hoʻomake ʻo Browne iā ia iho ma hope o kona hale ma Mānoa i ka makahiki 1991 ma hope pono o ka wā i nīnau ai kekahi o o ia mau haumāna ma mua iā Browne no kona lolo kukui ʻia ʻana.
ʻAʻole paha e pāʻani ana ʻo Jahlani Tavai ma ka hoʻokūkū e hiki mai ana i kēia hopena pule, kahi e kūʻē aku ana nā Koa Ānuenue iā Fresno Mokuʻāina. Ma ke kūʻē ʻana aku nei iā Nevada i ka Pōʻaono nei, ua ʻeha ihola ʻo Tavai ma ka hapahā ʻelua a ʻaʻole ʻo ia i komo hou i ka hoʻokūkū. ʻO Tavai, he 82 āna kulaʻi ma loko o nā hoʻokūkū he ʻewalu. He mahikua ʻo ia, a he pūkaha nō hoʻi i kekahi manawa.
Eia mai kā kākou ʻōlelo noʻeau,
Ahuwale nā pae puʻu o Hāʻupukele.
He ʻōlelo kēia no kahi mea i ahuwale.
Ke Aolama 