Ke ʻimi ʻia nei nā kānaka nāna i ninini i ka lāʻau make ma kekahi kahawai o Hawaiʻi nui o Keawe.
ʻO ia aʻela kekahi poʻo nūhou o kēia lā, ka lā 26 o ʻOkakopa, he Pōʻalima. Welina e nā makamaka. ʻO Ke Aolama kēia a penei ka nūhou.
Aia nō ka mākaʻi hoʻomalu ʻāina o Hawaiʻi ke ʻimi akula i kekahi mau kānaka ʻelua i manaʻo ʻia, na lāua nō i ninini i ka lāʻau make i loko o kekahi mau kahawai o ka mokupuni ʻo Hawaiʻi a make ihola nā ʻōpae Polapola he nui. ʻO ke kanaka mua, he 25 paha ona makahiki, a he ʻelima ona kapuaʻi me nā ʻīniha he ʻeono paha, a he 135 paona. A he lauoho ʻeleʻele kona. ʻO ka lua o ke kanaka, he 35 paha ona makahiki, he ʻelima kapuaʻi me nā ʻīniha he ʻewalu, a he 145 paona. A he lauoho ʻeleʻele kona. ʻO ka ninini ʻana i ka lāʻau make i loko o ke kahawai, he peloni papa C ia ma Hawaiʻi nei. Inā he wahi ʻike kāu no nā kānaka i manaʻo ʻia na lāua ia hana, e kāhea i ka helu 643-3567.
Eia mai kā kākou ʻōlelo noʻeau,
Pohu ka nohona, ua lulu kohekohe.
ʻO ia hoʻi, ua maluhia nā mea a pau.
Ke Aolama 