10-29-18

He ulia mokulele ko ʻInidonesia.

ʻO ia aʻela kekahi poʻo nūhou o kēia lā, ka lā 29 o ʻOkakopa, he Pōʻakahi. Welina e nā makamaka. ʻO Ke Aolama kēia a penei ka nūhou.

Hoʻi akula kahi kanaka loea hana kapa kuiki i ke ala hoʻi ʻole mai. ʻO John Fernandez Serrao Makua kona inoa. I ka lā mua o ʻOkakopa ʻo ia i moe ai i ka moe kapu o Niolopua. He mākaʻi ʻo ia ma mua. ʻO Serrao a me kāna wahine, ʻo Poakalani, he mau loea hana kapa kuiki. Ua hala ʻo Poakalani i ka makahiki 2012. Ua haʻalele mai ʻo Serrao i kāna mau kaikamāhine, iā Cissy Serrao lāua ʻo Raelene Correia, i kāna mau keiki kāne, iā Joseph lāua ʻo John F. Serrao ʻŌpio, a me kona kaikuahine, ʻo Josephine Huddy a me kekahi mau moʻopuna ʻelua. Aia kona hoʻolewa i kēia Pōʻaono. E hoʻomaka ke kipa ʻana i ka hola 9:00 o ke kakahiaka, a ʻo ke anaina hoʻolewa, i ka hola 10:30. Aia ma ka Hale Pule Pā Ilina o Oʻahu.

I ke kakahiaka o ka Pōʻakahi ma ʻInidonesia, kuʻu ʻino ihola kekahi mokulele o ka hui mokulele ʻo Lion Air ma ke kai. He 189 mau kānaka o luna o ia mokulele, he 181 mau ʻōhua, a he ʻewalu mau limahana. Ua haʻalele ihola ka mokulele iā Jakarta i ka hola 6:20 o ke kakahiaka a he 13 minuke ma hope mai, kuʻu ʻino ihola. He nui nā kānaka e ʻimi ana i nā kānaka e ola ana, ʻaʻohe wahi kino i loaʻa mai.

Lanakila aku nei ʻo Pokekona ma luna o ke Kūlanakauhale o nā ʻĀnela ma ka helu ʻai he 5 i ka 1 i nehinei. A lilo akula ka inoa moho i nā Kākini ʻUla o Pokekona ma loko o nā pāʻani he ʻelima. He ʻeiwa inoa moho o Pokekona, a he ʻehā i paʻa mai ma nā kikina he 15 i hala.

Eia mai kā kākou ʻōlelo noʻeau,

Ua mālie, ke au nei koaʻe.

ʻO ia hoʻi, he lā mālie ia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s