ʻO ka ʻaha hoʻomākeʻaka hope loa o kekahi o nā mea hoʻomākeʻaka o Hawaiʻi nei.
ʻO ia aʻela kekahi poʻo nūhou o kēia lā, ka lā mua o ka mahina ʻo Malaki. Welina e nā makamaka. ʻO Ke Aolama kēia a penei ka nūhou.
Ma ke Kahua Hoʻolulu Mokulele ʻo Daniel K. Inouye, hopu ʻia ihola kekahi wahine no ka loaʻa o ka pū a me ka pōkā i kona wā e komo ana i kahi hoʻomalu ʻia i ka Pōʻahā nei. Aia nō ka pū, he Glock 17 9mm, a me ka pōkā ma kāna ʻeke kau pū. ʻAʻole i hoʻopiha ʻia ka pū i ka pōkā. Ua hoʻokuʻu ʻia ua wahine lā, akā, he noiʻi aku koe. ʻO ka hoʻopaʻi e kau aku paha ma luna ona, e uku he $13,333. He hiki ke lawe ʻia ka pū ke lele aku ma ka mokulele, akā, he mau koina, ʻo ia hoʻi, ʻaʻole e hoʻopiha ʻia i ka pōkā, e hoʻokomo pono ʻia a e kī ʻia a paʻa ma loko o kahi pahu ʻaoʻao ʻoʻoleʻa, a e hoʻokomo ʻia aku ia pahu ma ka ukana e likiki ʻia.
He ʻaha hoʻomākeʻaka ko Augie Tulba i ka lā ʻapōpō, ka lā ʻelua hoʻi o Malaki. A wahi āna, ʻo ia kāna ʻaha nui e mālama ʻia. He 27 ona makahiki o kāna hoʻomākeʻaka ʻana i ka lehulehu. A ua kō kona makemake. I kēia manawa, he manaʻo kona e komo i ka māhele kālai ʻāina. Ma ka Blaisdell ana e mālama ʻia ai ia ʻaha hoʻomākeʻaka, a e hoʻomaka ana i ka hola 6:00 o ke ahiahi. A he mau hoa ko Tulba e kau ana ma ke kahua, ʻo ia ʻo Andy Bumatai lāua ʻo Frank De Lima. ʻO ka likiki, he $10 a i ka $20.
Eia mai kā kākou ʻōlelo noʻeau,
ʻO ka ʻOle ia, mai ʻOlekūkahi a ʻOlekūpau.
ʻO ia hoʻi, ʻaʻole loa.
Ke Aolama 